حكاوي المصطبة والغيط

منذ أكثر من 15 سنة تعرفت عليه كنت في أول دراستي الجامعية وكان هو وقتها في الخمسين من عمره فلاح بسيط يلبس الجلباب البلدي ويتحدث بلغة عامية صرفة ولكنه أذهلني بكلامه وثقافته وموهبته الفطرية وقد أعجب بي وأعجبت به وصرنا صديقين وإن كنت أعامله دائما علي أنه الأستاذ
وكانت لنا قعدات في بلدته ومع فلاحي قريته لن أنساها ما حييت وقد أصبح الآن شاعرا مشهورا وله دواوين وباب دائم في جريدة آفاق عربية
وقد قررت أن أسمعكم كلماته وأنا أعلم أنكم ستذهلون ...وقد اخترت له تلك الكلمات وهي بعنوان " إحنا ناقصين حرق دم" من ديوان حكاوي المصطبة والغيط ..وأظن أن حكاوي المصطبة لا يمكن أن تكون إلا في هذا المنتدي " كلام مصاطب"..وهو يقول ...:-


بعد شغل اليوم في غيطنا ..من عادتنا
كنا نقعد عند راس الغيط بتاعنا
عالقناية..تحت توتة
فارشة ضلتها النجيلة
كنا نقعد زي عيلة
والكلام يبقي براحتنا
نشرب الشاي في العصاري
قبل ما نروح بيوتنا
الكلام كان يبقي بينا عن جواز عبد السميع
والا صوت الشيخ مطاوع
والا مرسي في يوم جوازه
والا أسعار التقاوي
والا أسعار الكيماوي
اللي فاق كل التصور واللي زاد عن أي حد
مرة بنهزر ونضحك .مرة تانية نبقي جد
كنا بنفرفط همومنا اللي غطت لون هدومنا
...كنا دايما نبقي خمسة
زاد علينا الواد سلامة بن ابراهيم
واد بيفهم في المكن زي المهندس
المكن للري يعني
بالخصوص لوكان قديم
باختصار جه مرة جنبي . قالي شفت الملعونين؟
قلت مين؟
قال لي يعني حد غيرهم..اليهود والأمريكان..
قلت مالهم ؟ قالي مالهم ....إنت مش عايش معانا؟
ابتدوها حرب تالتة
خططولها سنين
وابتدوا بالفلاحين
قلت ليه؟ دول بيدونا التقاوي والكيماوي ..والمبيد
قال خلاص ..جبت المفيد
لما يدوك التقاوي والكيماوي والمبيد
تبقي اييه؟
قلت قولي من جنابك نستفيد
رد قالي نبقي لعيلهم عبيد
قلت ليه؟ قالي ما تخليك معايا
لو منعهم مرة عنا أرضنا نزرعها أيه؟؟؟
أو بأيه؟؟؟
قلت الله يعني أيه؟؟هي يعني الدنيا سايبة؟
فيه حكومة وفيه رقابة..وبرلمان
قالي آآآآه الكلام ده كان زمان
لما كان في كل دار ..صومعتين
جوه قاعة..اسمها قاعة الخزين
واحدة كان فيها التقاوي ...والكبيرة
ياخدوا منها للطحين
والا أيه يا با اسماعين؟؟

اتعدل عم اسماعيل
قالوه يابني كلمتينك معقولين
خلوا يا بني عقلي لف
وافتكرت أيام زمان
كنا دايما صف واحد
اسرائيل فرقتنا ..قسمتنا ألف صف
رد مرسي..قالوه يابا اسماعين..؟
كامب ديفيد مش عشان نبقي ف سلام؟؟؟
قالوه يابني
إنت فاهم..؟ السلام يبقي بكلام؟؟
والا يعني الحرب ضرب؟
للحروب أشكال كتيرة ..منها زي ما قال سلامة
في التقاوي والكيماوي والمبيد
منها برضوه في الصناعة والاقتصاد
اللي ماسكين الصناعة رجالتهم
المصيبة هما أصلا من عيالنا
بس منهم اللي هاجر..راح أمركا
الكويس يمسكوه..يبقي عالم عندهم ويجنسوه
أما لو يرجع بلاده يقتلوه عمرهم ما يسيبوه
واللي راح صايع وضايع هما برضوه يحتاجوه
يبقي واحد زيهم ويعلموه ..واحده واحده يلمعوه
يبقي صايع بس دولي سرقة نصب يدربوه
يبقي واحد شكل تاني جمزبوند الأمركاني
أي دولة جاي منها يبعتوه
لاجل ما يسرق فلوسهم ومرة تانية يستقبلوه
أصلوه حول عندهم أموال كتيرة يبقي لازم في المطار يستقبلوه
رد مرسي..قالوه أفهم. واحده واحده
بس قولي إزاي ح يسرق؟
قالوه...شوف
لما ييجي جاي لبلده
يبقي صايع...يكتبوا له في الجواز صاحب مصانع
يبقي جاي آخر قيافة والكلام يبقي بقلاطه
مرة تانية باللطافة واحنا ناس آخر هيافه
الكبار بيعظموه..للبنوك ويقدموه
بعد فترة ..بالخديعة والرشاوي
يشتري منا المصانع من فلوسنا في البنوك

قال سلامة : شوف كلام عم اسماعين
جاب قرارالمشكلة للحيرانين
شوف كلام أهل النباهة
واحنا بنقول الحكومة ...
ايه جري لها والبنوك
عايشة في متاهة
قول وكمل
قل كمان خيبة البنوك قول كمان لا فوض فوك
رد قالوه :بعد فترة يطرحوها
تبقي أسهم ويبيعوها
والعمالة يسرحوها
واللي زيي واللي زيك
مرة تانية يشتروها
ولما يقبض ..هب يالله روح لبره
قبل ما يسدد بنوك
ساقية دايرة يابن عمي
مش كفاية مصوا دمك قال كمان بيحلبوك
رد مرسي بأعلي صوته :
قالوه ينصر دين أبوك
قول وكمل ..هي دي حرب الصناعة ..
والتجارة والاقتصاد
كنت مش عارف سببها لما يسألني الاولاد
قال سلامة:للحروب أشكال عديدة
منها ...نبقي ع الحديدة
واقتصادنا يروح شتيت
اللي بيبيع الهوا
واللي يعمل بسكويت
واللي يعمل زيت وشامبو
واللي يعمل أي حاجة ..يبقي رامبو
والاجانب يبقوا جنبه
دا القطاع العام باعوه والقطاع الخاص يا مرسي
دلعوه
سلطوه يكتم نفسنا..
واللي ما يسبح بحمده ..يرفدوه
رد زيد عبد الرحيم
...قال يا مرسي : كله تخطيط أمريكاوي
شفت حرب المكروبات؟؟كلها أمراض بلاوي
ما تلاقيش حتي المداوي
كان زمان فشل الكلاوي ؟؟؟والا جه م الهرمونات؟؟
سمموا حتي النبات
والا شحم وزيت مخلط يبقي طعمه زبدة بلدي
شوفت خازوق المكسبات؟؟
والمصيبة....نزلولها اعلانات شجعوها الفلاحات
والسموم نشربها وبطعم الفراولة

قالوه محمود الكيلاني:
والا حرب الاعلانات...
شوفت ترقيص البنات ؟؟
اللي بتثير الغرايز
للشباب والا العجايز
كله متخطط وجاهز
لاجل حرب المسلمات
والمشايخ كلهم آخر سكات
قال سلامة ..هي دي
هي دي كانت بداية والبداية وصلتنا للنهاية
البداية في التقاوي والكيماوي والمبيد
والجديد
في التجارة والصناعة والسياسة والاقتصاد
حتي تعليم الولاد الفساد غطاه وزاد
والقيم الناس باعوها
بالدولار هما اشتروها
وبفلوسهم مزعوها
قطعوا توب العقيدة
العقيدة النهاردة واقفة ملط
زلط ملط
بهدلوها ف العراق
بهدلوها في الشيشان
والا في غزة ورام لله

قلت قول ..قول وكمل
ما انت متسلط علينا
لاجل ماتنكد علينا
وأنت عارف الطوارئ حكمها
ما تزيدش عنا..يعني خمسة
واحنا خمسة
قبل ما تشرف سيادتك كنا خمسة
مظبوطين حسب القانون
فز قوم ...فز يالله يابن زاهية
فز ياله وغور في داهية
والا اقولك قبل ما تطول لسانك
الكلام يفيد بايه؟
والا يعني بايدنا ايه؟؟
روح وقول للمخدوعين
قول لهم بوش ابن بوش
كل عقولكو بكلمتين
روح يا فالح قل لهم...ما تقولناش
هي ناقصة؟
والا يعني المبلة ناقصة طين؟
قال سلامة بن ابراهيم:
همه مين المسؤولين؟
قلت يعني مش عارفهم؟
طب هاقول مش حاخاف
همه حكام العرب
أو شيوخ المسلمين
وبصراحه همه دول الغلطنين...
همه لو بيفهمونا
والا كانوا بيسمعونا
إنما ساكنين قصور
فيها متعة فيها حور
لو نعبر عن ارائنا ...يمنعونا
يحسبوها قال مظاهرة
والعداوة تبقي ظاهرة
الحرس بيفرقونا..والمصيبة ..يحبسونا

قول لهم يابن ابراهيم
قولهم مركبنا واحدة
انتو خايفين منا ليه؟
واحنا خايفين منكو ليه؟
لو حنبقي يد واحدة
كان شارون ولا اسموه ايه
والا زفت الطين وبوش
كان يخاف م الشعب كله
لما نبقي يد واحده
أما انتم لو وحوش
وحكم ما تخوفوش
والمصيبة واللي أدهي من دا كله
كله عارف انها حرب الابادة
والوقوف ضد العبادة
كله عارف انها حرب العقيدة
والحكاية مش جديدة
مش حكاية ابن لادن ولا غيره
الحكاية كل طير بيلوف بطيره

روح وقول يا بن ابراهيم
روح وقول للمسؤولين
قول لهم راح نعمل ايه؟؟
وانت شايف كله شد لحاف ونام
واللي دافن راسه
في اللحاف زي النعام


سك ع الشاي يا بن خضرة
ادلق الشاي ف القناية
فز قوم
ميت يمين ما تعدي تاني
ما شارب شاي معانا
قعدتك أخبار بغم

جاتكو نيله جاتكو هم
كلكم نازلين كلام
احنا ناقصين حق دم
فز قوم.



انتهي الكلام وسنوالي ان شاء الله نشر أشعار هذا الفلاح الفصيح بعد معرفة ردودكم

جميلة صحيح
بس دى اشعار مين ومين الفلاح الفصيح(فالبيضة يصيح)
وكمل حلوة

الله ينور عليه وعليك

طبعا ماقرتش كله بس حفظت الصفحة علشان أحفظها

وياترى انت مخبى ايه تانى