أعمالى

**omar20hatem** · من طرف **omar20hatem** في السبت 06 سبتمبر 2008, 9:05 am

المرأة مكر ودموع

حيرتى نشأت
والشمس تاوى للفراش
وتهاوى الزمن
والعمر يسرع فى انكماش
أبالليل الخطيئة
أم أن حماى جدار من ريح
تقسوالعواصف
فلا تذر مجدا
ولا تدع له حتى ضريح
..............................................

أرق ويقسوالهوى
فأقسوفيهوى الحمى
أبحث للحيرة عن جواب
فيجيب عن سؤلى الذئاب
المرأة مكر ودموع
..................................................

أرجو مجيبا للنداء
والقلب مشتعل بداء
اتوه بينك وايامى
وأرتجف لأنك بأحضانى
أهواكى ...............
ماض يذكر بالألم
أرعاكى ......................
فعل يشعر بالندم
لقد منيت المكر فصولا على يديك
تربعت على عرش النفاق
اوصلتنى لكونك داهية
.............................................
فجأة ....
ألقاك كعصفور وديع
مخنوق ...مكسور ضعيف
يتنفس إعصار الخريف
يحتمى بأوراق الشجر
واللون الأخضر لا يحمى ضعيف
تزرفين الدمع بتقن بارع
تتحكمين فى كونه
حار أم بارد
أسفا
فما عدت راعى القطيع
علمتنى أن أكون ذئبا
يختبىء
ينزوى
ثم يفترس الحمل
...........................................
عذرا
فما عدت مرتجاى
صنعتك بادئا
وقتلتك منتهاى
أتحلمين بعرش الخلود
اتحلمين بعرش العاشقين
أتعشقين
إثم لمعنى العشق جمعك فى رعاياه
حاولى أن تبصرى غير نفسك
جربى أن تولدى من جديد
تعلمى كيف تكونى
أما ورضيع
وإن حاولت أن تدمعى
فاجتنبى زيف الدموع
لكى تحملى شعار الفخر
بكل الفخر
امرأة ............................
دافئة الدموع

**omar20hatem** · من طرف **omar20hatem** في السبت 06 سبتمبر 2008, 9:07 am

كتكــــوت دملـــــــو الصبـــــــح رايــــــــح على الكٌتُّـــــــاب

قابلـــه سيِّدنــا ارتعــــــــــش ليــــــه بــــــــدون أسبــــــاب

سيِّدنـا مقــــامـه عالـــــى فى السمــــــا واحنـــا له خُــــــدُّام

واللــــى مـازار دمــــلو ماعـــرف يعنـــــى إيــــــــه كٌتُّـــــــاب

**omar20hatem** · من طرف **omar20hatem** في السبت 06 سبتمبر 2008, 9:08 am

حبيب مصاطب

انا كنت ليله سهران بفكر
ايديا وقعت على الدفاتر
كلام كتير متبعتروتايه
جوه الدفاتر وبره الدفاتر
حسيت بغربة وشوق كبير
لليالى عيشتها فـ قلب البلد
عسلها الاسود ولقمة فطير
حسيت بدق قلبى اتولد
افتكرت ليالى الشتا
والقاعده على المصطبة
والبرد ينهش فى عظمى
وانا قاعد على المصطبة
لكنى وسط الغربة
والدفى اللى ماهوش دفى
حنيت لبرد الشتا
والقاعده على المصطبة
صحبة ولمه وضحك عالى
هزار وجد لعب وتسالى
يامحلى القاعده عــ المصطبة

وافتكرت
زمان كنت عيل طيب قوى
فى البيت فى الشارع فى المدرسة
كان اسمى رومى ومتختخ قوى
دا كلام بجد مش مـقـلسه
قالت الأبله تعرف تغنى
رفعت صابعى وقلت انا
قالت لى أيوه قلت انا
وشالتنى فوق وقالت لى غنى
غنيت وقلت
انا جناينى وبزرع ورد
ورد لونه بلون الخد
ازرع ورد واقطف ورد
وابيع الورد
يامحلى الورد
وسمعت سقفة جامده قوى
وبوسة على الخد حلوه قوى
وافتكرت
ليلة العيد السعيده
بيجاما كستورجديدة
أم الزراير على الجناب
وخدنا الأجازه من الكتاب
حليمه ياحليمة
يامرضعة نبينا
قومى رضعى محمد
رضعته امينه
وافتكرت
دكان سيدى عبدالغنى وستى ام صبرى
خد لك فندامه ياواد أنتشها وأجرى
هات كرمله يا سيد حتة حلاوة يا ست
يا واد خليك بعيد خليكى هناك يا بنت
والرقده على الفرن فى الشتا وحوض الطرمبه
بعد الخبيز والعشا فى الدفى نديها زمبه
نايم من غير غطى لكنى حاسس الدفى
وسط الحبايب أصل الدفى يبقى عفى

وافتكرت
يوم امتحااااااااان الشهادة الإبتدائى
وما أدراك ما الشهادة الابتدائى
رحت بنها ويا ابويا امتحن
دايما يقول لى يا واد خليك فطن
كلام كتيرقوى ابويا يعيده
وعينى على كيس ماسكه فى ايده
ساندوتش بيض وحاجة ساقعة
لزوم الشهاده الابتدائى
تمر الدقايق على ساقعة
مستنى ميعاد التلاقى
ويا حبى اللى بريده
كيس ابويا ماسكه فى ايده
الله يرحم زمان
وحلاوة ايام زمان
وافتكرت
الاعدادية دخلت انا
اصحاب جداد وناس جديدة
بنات فى لبس جديد سعيده
وابتدينا نقسم فى الحلوين
الحلوه دى ليك ودى لى انا
والانجليزى ومى يعنى أنا
خلاص راحت ايام المريله
والمد على الفلكه والمهزله
بقيت افندى فى العلالى
جزمة موريتان بكعب عالى
ساندوش بتعريفة و بتعريفة مهلبية
مرقة الدكر وطشة الطعمية
الله يرحم زمان
وحلاوة ايام زمان
وافتكرت

فى تانية ثانوى
اصحاب جداد لكن فى بنها
عرفنا الجديد جوه المدينة
سيما ومدارس بقسمة عدل
وكنت هسقط بسبب المدينة
ماانا قروى ساذج
راح المدينة
ماعرفش فيها غير الضياع
وما شافش فيها غير الضياع
كله ضياع وربك ستر
عديت فى تانية
وحلفت ماارجع
للسكة ديه
وبديت مشوار النجاح بهمه
وقلت خليك راجل بذمه
ونجحت يابا وهبقى مهندس
فرحان ياابويا فرحانة ياامه
هبقى مهندس
ومن يوميها كبرت جدا
وبقالى صحاب كتيرة جدا
وعرفت طريق المصطبة
من يومها وانا حبيب مصاطب
اروح وارجع للمصاطب
الف وابعد وما انساش حبيبتى
احلى الحبايب
احلى ليالى صيف او شتا
ليالى المصاطب

**omar20hatem** · من طرف **omar20hatem** في السبت 06 سبتمبر 2008, 9:09 am

تلات نخلات بلون السما متصورين

تلات نخلات فوق مكتبى

زى الشراع فوق مركبى

أكبرهم زيى انا مشتاق لك

وتانيهم حياتى ودنيتى وعمرى واستهلك

واصغرهم وليدى ووليدك

فوق شفايفه بسمتى وحنيتك

احسك من لمسته واحسه من لمستك

احبك واحبه واحبه واحبك واحبك واحبك

لحد ما ادوب جوه الحنين

لحد ما اتوه بين السنين

يا احلى عمر واحلى صحبة متجمعين

يا تلات نخلات بلون السما متصورين

هى هدية من حبيبتى عبارة عن 3 نخلا ملتصقين ببعض بجذر واحد كبيرة واقصر وصغيرة

وقد صورت نفسى الكبيرة وحبيبتى المتوسطة وابننا ان شاء الله النخلة الصغيرة وقد وضعت الهدية فوق مكتبى اراها امامى اثناء المذاكرة

**omar20hatem** · من طرف **omar20hatem** في السبت 06 سبتمبر 2008, 9:10 am

حلمى على قدى
..................................

زمان سمحت لنفسى أحلم
حلم صغير على قدى
وبديت بهمه وتحدى
كان حلمى كمان مش ليه
لولادى ولد وبنية
كل منايا تدوم العافية
واحوش 50 الف جنية
مش علشان اعمل بيــــه
لكن خايف من الزنقـــــــــة
ابنى راح يشترى شــــــــــقة
طبعا علشان يتأهل
وطالما الدولة بتستهبل
مش نافع قــــــــرعة ولاواسطــــــة
ولا رشوة نائب او اسطى
لكن من عرقى وشغلى وصبرى
طبعا صبرى ما هوش خالى
اقصد صبرى على حالى
علشان اعرف اشترى شقة
تعينه فى أول مشواره
يرتاح البــــــال والنيــــــة
زى ما أبـــــويا عمل ليــــــــــه
ربك رزاااااااااااق وكريم
وشوية صبر وتصميم
كبر حلمى واتعلم
وبدا يحبى و يتكلم
وابتديت أحققه وبنبت
و اتحول من شقة لبيت
بيت لى ولابنى ولبناتى
ولمراتى شبه امى وحماتى
بندعى إلهنا الرحمن
يتمم فضله علينا
ونكمل كل اللى بدينا
وبقول لك ياعزيزى اسمعنى
ما تقولشى على فلان اشمعنى
خلى أحلامك مشروعة
وبهمه دايما مرفوعة
ما تخافش أبدا من الزنقة
بيتى كان أوله شقه
ولاتنسى تدعى لى على حكايتى
ولا تنسى
حلمى كان ايه فى بدايتى

**************

**omar20hatem** · من طرف **omar20hatem** في السبت 06 سبتمبر 2008, 9:11 am

بياع الهوى

بياع
بياع الهوى يا حبايب
بياع الهوى وأنا دايب
تعالوا وقربو يا حبايب

بص ع الفاتورة يابيه
دى فاتورة وتمنها جنيه
تملاها وترضى بالمكتوب
تملاها وهو ده المطلوب

هى
بياع الهوى دى عجيبه
ولو كان الهوى بينباع
دا محدش يجيلو صداع
واشترى تبقى هى العيبة

هو
وإزاى الهوى بتهديه
وازاى الغنى بتشديه
ازاى قل لى ايوه ازاى

بياع
بفاتورة وتمنها جنيه

بيقول السؤال الاول …….. بتحب ؟

هو
أيوه من عمنول

بياع
بيقول السؤال التانى ............ رايداه؟

هى
هو كل زمانى

بياع
من تانى السؤال الاول ........... بتحبى؟

هى
أيوه من عمنول

بياع
من تانى السؤال التانى.......... رايدها؟

هو
هى كل زمانى

بياع
الشوق ؟

هى
ايوه أه من الشوق

بياع
تشتاقى ؟

هى
ويا ريتنى ما افوق

بياع
الليل ؟

هو
أيوه اه من الليل

بياع
سهرانه؟

هو
ولىَ فيه مواويل

بياع
الثانية ؟

هو
دنيا فوق الدنيا

بياع
وياها ؟

هو
يبقى يا محلاها

بياع
البسمة ؟

هى
هى أجمل نسمة

بياع
محلاها ؟

هى
واقول كمان الله

بياع
دلوقت لازم تهدى فى الرد يا مشتاق
دا الهجر مر وياعينى ع العشاق
ويا ما دابت قلوب بالقرب ياالله
وييجى الهجر يحصدها ويابخت مين عداه

هو
انا مهما قاسيت من الحب هتمناه
ومهما جفانى القرب حستناه
واقول يارب زدنى جراح
علشان اقول كمان الله

هى
ياله بينا نحضن الايام
نرسم الشوق نعشق الاحلام
نروى القلب اللى بات عطشان
ما تياللا قوام دا البعد حرااااااااااااااام

البياع وهو وهى

ياله بينا نحضن الايام
نرسم الشوق نعشق الاحلام
نصحى القلب اللى بات عطشان
ما تيالله قوام دا البعد حرااااااااااااااام

البياع لوحده ذاهبا

بياع الهوى يا حبايب
بياع الهوى وانا دايب
تعالو وقربو يا حبايب

**omar20hatem** · من طرف **omar20hatem** في السبت 06 سبتمبر 2008, 9:12 am

**omar20hatem** · من طرف **omar20hatem** في السبت 06 سبتمبر 2008, 9:13 am

القدس يئن وينوح
.........................................

نرتجف من حر الصيف
نختنق من برد شتاء
لا نعلم ان كنا الضيف
أم صرنا نزلا لإيواء

...............................................

الأن وقدعم الظلم
وبأمن الفسق ينام
فلنطلق طلقات الجمر
ولنعلن للزهد صيام

............................................................

القدس يئن وينوح
يستصرخ فى كل صباح
الطاغى قد زاد قبيحه
قد بدل الآذان نباح

..................................................................

العار علينا ياإخوه
أن ينعت قوم بالنخوه
واليأس قد صار قيودا
تبعدنا عن ركب الصفوه

........................................................................

البيت يحتاج دعائم
ودعائم بيتى أبنائى
أبنائى قد صاروا جماجم
فهل لى فيكم أبنـــــــــــــــــــــــــــــــاء

.............................................................................

الأرض عطشى يارجالى
والماء لا يسقى رمالى
فرمالى يسقيها دماء
والدم فى جسد الضال

.........................................................................................

ياصخر أفحقا تنطق
تدعونى لجهاد الله
أم أنك لله ستسبق
والسابق لله كفاه
..........................................................................

يامسلم قد نطق الجامد
يامسلم ألقدسك جاحد
يامسلم والله لعار
أن تطعم وحسامك خامد

.............................................................

**omar20hatem** · من طرف **omar20hatem** في السبت 06 سبتمبر 2008, 9:17 am

إن كنت قــــــــــــــيدك فحِــــــــــــــــــــــلُك أن تنزعــــــــــــــــــــــــــــــــــــــــــــــيه
إن كنت كأس خمـــــــــــــــــــــــــــرك فلك أن تسكبـــــــــــــــــــــــــــــــــــــــــــــــيه
وإن كنت ليــــــلك المظــــــــــــــــــــلم فلك أن تهجـــــــــــــــــــــــــــــــــــــــــــــريه
وإن كنت فارســــــــــــك المفــــــــدى فلك أن تأمــــــــــــــــــــــــــــــــــــــــــــــــريه
_________________

**omar20hatem** · من طرف **omar20hatem** في السبت 06 سبتمبر 2008, 9:17 am

ارحــــــــــــلى

ولأن لون عيناى لا يرفع نبضك
ولأنى تعودت التقاء شمسى بهمِِك
فقد قررت أن ترحلى ...فلتنتهى
وليكن لى ليلى ولك ليلك
فقط أطلب حقى
فى استرداد قلبى
أطلب قلبى
يسلك دربى
فلترحلى
وأعيدى إلىَ قلبى ولك قلبك
فعندما تموت بين أيدينا كل وردة حمراء
وعندما يهتدى القلب لنبض الإنتحار فلا بقاء
عندما لا يبقى لنا سوى الأشواك
فلترحلى
وأعيدى إلىَ قلبى ولك قلبك
لقد كان الحب بقلبى روح ملاك
وقد غدوت الأن بسواد الليل
بشموع الحزن المحترقة
خلف جدار
فكيف لى بين سواد الليل اتمنى النار
فلترحلى
واعيدى إلىَ قلبى ولك قلبك
بقليل من الحظ حفرت الحب بماء الذهب
بإشتياقى وإنتظارك صارت خيوط الوصل
خيوطا من لهب
والان وقد غدى الوصل حلما
اختفيت اندثرت تواريت
كالقمر فى آخر الشهر العربى
أقولها لك وداعا
فلن يكون هناك هلال آخر
لأن لون عيناى لا يرفع نبضك
ولانى تعودت التقاء شمسى بهمك
فلترحلى
وأعيدى إلىَ قلبى ولك قلبك
15/7/1991
حاتم أبوالعزم

**omar20hatem** · من طرف **omar20hatem** في السبت 06 سبتمبر 2008, 9:18 am

صدقينى

صدقينى أنا كنت خايف

صدقينى دا الموج مخالف
صدقينى أنا هنسى بكره
والفرع الاخضر لساه بيحلم هيعيش لبكره
لساك يا غصن النور مادد لعالى
ماأنا كنت عارف
وعلى قلبى خايف
ماأنا كنت عارف
داالموج مخالف

**omar20hatem** · من طرف **omar20hatem** في السبت 06 سبتمبر 2008, 9:20 am

يد فى جيب آخر

إنه صباح السبت ينتشر الموظفون والطلاب فى كل مكان كقطرات المطر الغزير , تسقط بكثافة لتصنع سيلا من البشر , إنه صباح السبت

الكل يبتدىء أسبوعه بهمــــــــة ونشاط فعال حتى أصحاب الخبرات المتمرسة كالنشالين وما إلى ذلك يكونوا فى ذروة النشاط والفعالية .

شاب أسمر فى كامل صحته ومقتبل العمر, ثقافة عاليه , تقاسيم وجه مريح , لون مصرى أصيل , هذا كله طبعا حتى يستقل الاتوبيس ,ينتظر الأتوبيس المعتاد إلى كليته فتنظر إلى وجهه العبوس الغاضب وكأنه يحمل هــــُم الدنيا فوق كتفيه , وإن سألته بدت الإجابة واضحة وبطلاقة .

إنها علبة السردين فى كل صباح وياله من صباح هذا الصباح , إنه صباح السبت , ولكنها المسيرة .

جــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــاء الأتوبيس.

اندفعت غليه الجموع وكأنه لا مخرج لهم من الهلاك إلا من وسيلة الإنقاذ الوحيدة فى صورة أتوبيس,فاندفع معهموساير مصيره وكانه الحشر , اتخذ مكانا استراتيجيا فهو يرتمى بظهره على زجاج الأتوبيس فى مكان خال بجانب النافذه ويمسك بيديه احد الوابت الأفقية والتى توازى جبهته فهو أيضا طويل .

وفى أثناء رحلة الحشر اليومية وقع بصره على يد تمتد فى جيب آخر , فاندهش وكاد يندفع وراء تعاليم مبادئه وأخلاقه , فإذا باليد تخرج فارغه دون نتيجه , فأخذ نفس عميق وقد ارتاح لأنه لم يتسرع فى الحكم , ولكنه ظل مراقبا الموقف فإذا بنفس اليد تمتد فى جيب آخر وكأنها اعتادت فعل ذلك , فظل صامتا وإذ باليد تخرج بحافظة زرقاء منتفخة , فاحمر وجهه وتصبب عرقا , فيسائل نفسه , هل أنتفض ؟ هل أسكت ؟ هل هل .....؟

وظل متحيرا حتى .................

احس بسلاح حديدى موجه إليه فى جنبة من شخص آخر يقوم بحماية الأول , فكتم لسانهووضع عيناه أرضا خزيا من نفسه وعلى نفسه , وإذ بالحصل يعلن عن المحطة القادمة (( الأزهر )) وهى غايته .

نزل الشاب الأسمر مخذولا وكأنه سلب كل ماتعلم وتربى عليه من شجاعة إقدام ومروءة.

سلبت منه مبادئه امام سلاح ابيض لعين موجه إلى جنبه ,فذهب تاركا لسانه أخرسا خلف عينان لا تنظران إلا إلى التراب ..

حاتم ابوالعزم

**omar20hatem** · من طرف **omar20hatem** في السبت 06 سبتمبر 2008, 9:21 am

وسقطت ورقة

جلس فى الشرفة الصغيرة والتى تتجه نحو الشرق , ومن امامه العمارات الروتينية التى تبتعد بمن يراها عن أى معنى من معانى الجمال, كما انها قوالب تحجب عنه وعن شرفته الصغيرة إشراقة الشمس الصافية .

جلس يتصفـــح مذكراته ووقعت عينــاه الثـاقبتـان على ورقة ذات ذكرى لطالما تطغى على أفكاره وتجذبه عن كل الشواغل , فأخذ يقرأها ولو أحصينا عدد مرات قراءاته لتلك الورقة لتعدت الألف مره فى خلال سنه ونصف , وأثناء قراءاته جاءت لفحة نسيم باردة فرطبت عن صدره هواء مدينته الجاف , وذكرته بموطنه الريفى الجميل , والهارب من مشاكله وذكرياته الثقيله فشرد قليلا فى ذكرياته وكم هى جميلة دافئة قاسية ثقيلة , ثم عاد يستكمل قراءته لورقته المفضله , فوجدها قد حملتها النسمة الباردة إلى ركن الشرفة البعيد نسبيا , فنظر إليها نظرة واهنة تنم عن وهنه وضعفه, وهــــــــٌم يلتقطها فتواهن , ونظر إليها نظرة تبدووكأنها الأخيرة وراح يستطلع ورقة أخرى , ويبدو أنها ذكرى أخرى ...............وما أكثر الذكريات

**omar20hatem** · من طرف **omar20hatem** في السبت 06 سبتمبر 2008, 9:21 am

فتاتا الشرفة

كتبت فى الماظة 1992 م

الشمس تتجه للغروب , لتسكن من عناء رحلة يوم شاق , تستعد ليوم جديد قاس وشديد, نظر عاليا وقرر أن يستمتع بهذا المنظر الخلاب من فوق السطوح , وياله من شفق يروع بقدر ما يمتع.فنظر إليها ولونها الاحمر الآخاذ للقلب فدب فى نبضة الشوق ممزوجا بالرهبة , احس بنبضه يرتفع فأراد أن ينشغل عن خوفه بشىء أكثر متعة فالتفت باحثا فوجد هناك على قرب فتاتان تجلسان فى شرفتان متجاورتان , احداهما بلباسها الأصفر الفاقع وشعرها المسدل على كتفيها كشلال ماء عذب يخلب الابصار , وبشرتها البيضاء الناصعة والتى أضاءت دنياه مكان الشمس الغاربة , أخذت تبتسم حين اهتم بها فشغلته .
وفى الشرفة المجاورة وجد فتاة تنم ملامحها على انها فتاة مهذبة متدينة , لباسها الأبيض وطبيعتها الهادئة ووقار يجذب القلب فاخذ يحول وجهته إليها فاظهرت له الخجل ,فوقع فى حيرة من أمره حيرة شديدة .
لأيهما يقرر أن يقترب ويتقرب , ذات الرداء الأصفر الفاقع أم ذات الثوب الأبيض الهادىء.
ضاقت به السبل فهو يرغب فى فتاة جميلة منطلقة حينا, وهادئة خجولة حينا آخر .
دلنى أيها العقل , أيها القلب ,دلينى ياعينى , دلينى يا شمسى لا تتركينى محتارا.
وفى أثناء حيرتة الشديدة إذ بصوت عااااااااااااال يدوى فى مسمعه ( يا سيد ), فأفاق من خياله إنها أم محسن زوجته الغالية تنبهه بأن والدها قد حضر لزيارتهم وهو الأن منتظر فى غرفة الاستقبال , فذهب مسرعا ليقوم بواجب الترحيب لحماه العزيز وترك وراعه خياله الخصب وفتاتا الشرفة ومغيب الشمس.

**omar20hatem** · من طرف **omar20hatem** في السبت 06 سبتمبر 2008, 9:22 am

حواس باردة

كيف اذوب بنار العشق وأنت أمامى كحجر الجليد, ذوبى عشقا , جودى شوقا , انزعى رداء الجبن , اهجرى جفاء العين , وأحيى حبا قد صار بليد.
لا أسمع خفقات قلبك ,هل صار صخرا أم تبدد بالوعيد
لقد اختنقت من العلل البارده, اصرخى فلم تصبحى كهلا مشيبا , لا أطلب مستحيلاأو معجزه, بل إذا ناديت ألقى مجيب ,فاخرجى من قالب الحرص ورددى أنغاما سعيده .
إن كان لقيانا خطا فلما التقينا , لا أحتمل ان أنتظر شفاه بارده , كيف ولم انتظر نظرات بارده , قلب خائف , جسد متجمد , عواطف مخنوقه , أرجوكى ......... اخرجى بعيدا عن نطاق العدم الهامد .
سرقة حبنا !!
ذنب عشقنا !!
أصبح بك هكذا , فأفيقى لا أستطيع سوى ان أقول , ما زلت افتقدك .
أين فيكى الحياه, فأنا أراكى ذابلة , وكانك وقعت فى شرك لا مخرج منه , هكذا أعيش بشعور دافىء مخنوق .
أحبك وافتقدك
فإذا دام حالى هكذا أظننى قد انتهيت.
أفيقى فأنا على حافة الضياع , وأرجوا أن لا يكون سبيل جهادى فى الوصول غلى عرشك هو صعود إلى الهاوية.
حبيبتى
وملكتى
ومليكتى
وملاكى
أحبك وافتقدك.

**omar20hatem** · من طرف **omar20hatem** في السبت 06 سبتمبر 2008, 9:23 am

صورة نثرية

اتخيلك تقبلين على من بعيد البعد قريب القلب , تأتين على صفحات الموج المتتابعة فى رقة وكانها تعزف سيمفونية الرقة العذبة , على امتداد الموج الازرق أراك جالسة على عرش الجمال والبهاء ,من حولك أسراب الطيور تطرب وتغردأعذب الأصوات عى أرق موسيقى , يعلوشراعك الناصع البياض فى سماء الطهارة والعفة, فيدفعه النسيم الهادىء نحوى , تظلك من أعلى سحابة الحب الوفى , تسمح لضياء الشمس بأن ينساب فى خيوط كشلال عذب طاهر فينصب على وجهك المشرق فيضىء لى طريق النور طريقنا .

أحبك مابقى العقرب يدور

أحبك ببقاء التاريخ

أحبك بخلد الجنة

أحبك تاج النبل والعطاء

أحبك...............................ــــــــــــــاء

**omar20hatem** · من طرف **omar20hatem** في السبت 06 سبتمبر 2008, 9:25 am

تأمـــــلاتى

وأظل أسلط فى الأفق تأملاتى

....

إلى من أو إلى أين بعينيك تنظرين

...

مابال أهدابك تنثنى فى رفق

...

وعينينك تنطلق فى كبرياء

...

]بربك أخبرينى

...

هل تجوب الأفق عينينك إرتجالا

...

أم أنك عنى .........تبحـثـــــين

.........

**omar20hatem** · من طرف **omar20hatem** في السبت 06 سبتمبر 2008, 9:26 am

أنا

أنا مش بغيبتك هفقد سبيل
أنا مش بحبك هفضل ذليل
عمرى ما أكون أبدا مرادك
هفضل بصورتى دايما قصادك
وإن ملت تانى عمرى ما اميل

......................................................

مهما كبرت ..مهما بعدت
هتعيشى فى ضلى زى زمان
قلت بحبك .. روحتى وغبتى
وضاع وياكى كل أمان

...................................................

يمكن ألاقى فى غيرك قلبى
والقى معاها حياتى افراح
واسهر معاها وتفضل جنبى
تلمح عيونى عينيها ارتاح

............................

أنا مش بغيبتك هفقد سبيل
أنا مش بحبك هفضل ذليل
عمرى ما أكون أبدا مرادك
هفضل بصورتى دايما قصادك
وإن ملت تانى عمرى ما اميل

**omar20hatem** · من طرف **omar20hatem** في السبت 06 سبتمبر 2008, 9:28 am

اعتزلت الحب

قيـــــــد أنت ام حــــــــــــــــرية

إنــــــــــــــس أنت أم جنيــــــــــــــــــة

كــــــــل يــــــــوم أغـــــــــــرس حـــــــــــب

وأرضـــــــــــك بــــــــــور لا تستجـــــــــب

واعـــــــــــــــود فأعشـــــــــــــق فيــــــــك الســـــــراب

.................................................

اعتـــــــــــزلت حبـــــك فلــــــن أنتصـــــــــــر

شهابــــــــك عـــــــدوى وليــــــــــلك عبــــــــــر

حــــــــــــــرام عليـــــــــك ذبحــــــــــت المنــــــــــــى

دعــــــــــــــوت القيــــود وصــــــــــلت الفنـــــــــا

وعمرانـــك دومـــــــــا يهــــــــــــتوى خـــــــــــراب

...........................................................

غنــــــــــــــــاء البلابــــــــــــــل يــــدوى نحيـــــــــــب

وثلـــــــــــــج الريـاح عـــاد لهيــــــــب

فشــــــــــــدوك حــــزن يطـــــــــوق الكـــــــــــــــلام

وشــــــــــــدوى ضـاع وســـــــــط الزحـــــــــام

عـــــــــــــودى فمــــــــــا للملتــــــــــــــقى من ذهـــــــــــــاب

.......................................................

أصـــــبحت أراكـــــــــــن وجـــــــــوها شقيــــــــــــة

مــــــــــازلــــــت ألعــــــــــــن تـــــــــــلك الخطيــــــــــــة

اليــــــــــــــوم عــــــــدت فمـــــــــن يأتمــــــــــــن

بـالأمــــــــس خنـــــــــت وكنت الثمـــــــــــن

فيــــــــــــا حـــق ولــــــــــًى تـــــــلك الذئــــــــــــــاب

.....................................................

صرت الأن حجــــــــرة مهجـــــــــورة

وجرحــــــــك كما يمــــــــامة مكســـورة

أراكــــــــى تنــــزعى العطـــــــف منــــــــــى

أراكـــــــــى ترتـــــــوى السقـيــــــــــــــــا دمـــــــــــى

فمـــــــــــــــوتى فــــــــــداؤك حســـــــــن المــــــــــــآب

................................................

لــن أرتحــــــــل ...لــن أعتــــــــزل

ولسوف أغفــــــــــر ذاك الذلــــل

فأنت بمثـــــــــــوى عطيـــــــــــة إلـــــــه

وقربـــــــك يعنـــــــى قضــــــــاء الصــــــــــلاه

فيـــــــــا حزن ولـــــــــُى ويافــــــرح .......اقتــــــــراب

**omar20hatem** · من طرف **omar20hatem** في السبت 06 سبتمبر 2008, 9:29 am

دور يا زمن

دور يا زمن دورتك

واحنا معاك دايرين

فادى الضنى فى خطوتك

شيل الأسى من العين

ساعات والله نسمع فى قصصنا غناوى

وساعات والله نرجع ونعد الخطاوى

وبنحلم نشوف

أو نقرا الحروف

نمحى كل خوف

من قلب المداوى

.............................................

مشوار طويل داير بينا

واحنا اللى فينا مكفينا

وخايف لـ الزمن يقسى

تموت البسمة فـ عنينا

دور يا زمن دورتك

واحنا معاك دايرين

فادى الضنى فى خطوتك

شيل الأسى من العين

................................................

وتغيب الحقيقة ويا الشمس فـ المغرب

واحنا نقف ساكتين

ونفرد شراعنا ونسبح فـ البحور نهرب

لكن طريقنا منين

ونستنى القمر يطلع

ياعينى والقمر مسكين

دور يا زمن دورتك

واحنا معاك دايرين

فادى الضنى فى خطوتك

شيل الأسى من العين

............................................

**omar20hatem** · من طرف **omar20hatem** في السبت 06 سبتمبر 2008, 9:30 am

كلام مظبوط

فى يـــوم كنت قاعــد بشـــــــــوف كتكــــــوت

عينـــى رأت موضـــوع تمــــام فى تمـــــــــام

مريت لقيــــت الكـــــلام صحيــــح مظبــــــوط

ياعينـــى على الكلمـــات ياســـلام وألف ســـلام

........................................................

عمـــنا هيمـــا قـــال ســــــــــــرقت أجنـــــــــده

طلعـــــت بتاع الشاعـــــــر حمــــــــاه العمــــده

فنجـلـت عينـــــى عشـــان أتلقـــــى وأتشحـــتف

كــــــلام جــــــواه العســـــل محشـــور ومتلفلف

...........................................................

قـــــال خـــد عنـــــدك مــــن الأشعــــــــــــــــــــار

مـن الـــــــــورد مـن الفـــل من الأزهـــــــــــــــار

قــريت أول حكــــــاية عجبتـــــــنى كتــــــيـر جدا

لكنـــــه واضح دا هيمــــــــا بخيــــــــــــــــــل جدا

.......................................................

يا ست مــــــــــى وصـــى أبـــــوكى على كتكــــــوت

يا كســـــائى ياامبـــــــابى يا أحمس يا حتسبـــــشوت

عايـــــــــزين حبة رضـــــــا وحبتــــــين وتلاتـــــــــه

خلينــــــــى أشبـــع بقـــــلاوه و عســــــل قبل ماأموت

...............................................................

**omar20hatem** · من طرف **omar20hatem** في السبت 06 سبتمبر 2008, 9:31 am

تمهلى ولا تكونى حائرة

إشتاقى فلن تكونى كافرة
وإن أردت أن ترجعى
فأعلمى
بأنك على محيط دائرة

**omar20hatem** · من طرف **omar20hatem** في السبت 06 سبتمبر 2008, 9:31 am

وبدون حلفان

أنا حبى ليكى إيمان
أنا بيكى ومنك وإليكى
والخير شوفته على إيديكى
وياكى ما شوفتش غدر
ماشوفتش هجر
ما بحسش غير كل أمان
وبدون حلفان
أنا حبى ليكى إيمان

**omar20hatem** · من طرف **omar20hatem** في السبت 06 سبتمبر 2008, 9:32 am

طرحة بيضا

يا امو طرحة بيضا

يااموطرحة بيضا فى الضى بتلالى

بدوب فى الضحكة والنظرة بتنادى تعالالى

بحس الخطوة اتحير

ودق القلب يتغير

واطل عليكى انده لك

القاكى رايحة .................ضحكالى

.........................................................

ينادى قمرى مشتاق لك

ولونى قمحى من شكلك

فهمسك بلتقى نفسى

فنفسك بلتقى ضلى

فضلك بلتقى النسمة

والنسمة دى نشيد اسمك

.......................................................

أحبك ولو نجمك ماهوش دارى

احبك ولو دام حبك يزيد نارى

احبك قرب وبسمة وفكرة

احبك حالى وبكره وذكرى

احبك ولو قلبك راضى بحالى

احبك واحبك واحبك .........ولا دارى

ياموا طرحة بيضا فى الضى بتلالى

**omar20hatem** · من طرف **omar20hatem** في السبت 06 سبتمبر 2008, 9:33 am

ما اروع ان تنتمى

أتذكرين

أتذكرين كيف كنا إبهاما وسبابه

تحاببنا....التقينا.....التصقنا

أحسسنا الورد كيف يغار

زوجنا الحكمة بالأشعار

ألهبنا البحر بنار الشوق

فيخف ...فيرقص ...فيصير بخار

.................................................

ياحلما حطمه الفراق

ذهبت عنى فكيف بأن أشتاق

السهد غار

والدمع حار

وليت والبين إبتلاء

والحب علمنى الإنتماء

.................................................

أعشقك وبالذكرى أحتمى

فيا من تعيش بلا أمانى

ويا من تريد كل المعانى

ابحث عن ذاتك فيها

ولا تكل فتنحنى

ولا تضل فترتمى

فما أروع أن تنتمى

فالحب علمنى الإنتماء

.............................................

ابحث وتعلم تشكو

وتلذذ من كل عناء

جرب فلربما ترضى

وتشبث بأشعة شمسك

وتغنى فى كل نداء

...............................................

فالليل وإن يصبح عتمة

فلتسكن واخلد ترعاها

ولتلعق من نهر شفاها

ولتصنع جرحا للذكرى

فلذيذ الذكرى بصباها

فما أروع أن تنتمى

فالحب علمنى الإنتماء

**omar20hatem** · من طرف **omar20hatem** في السبت 06 سبتمبر 2008, 9:34 am

أنا مش بغيبتك هفقد سبيل

أنامش بحبك هفضل ذليل

عمرى ماأكون أبدا مرادك

هفضل بصورتى دايما قصادك

...........................

.............................

وإن ملت تانى عمرى ماأميل

**omar20hatem** · من طرف **omar20hatem** في السبت 06 سبتمبر 2008, 9:35 am

ومازال يطعننى سؤال

كيف أهديت قلبك أن ينبض بإستمرار

وكيف أهديت قلبى نبض الإنتحار

**omar20hatem** · من طرف **omar20hatem** في السبت 06 سبتمبر 2008, 9:36 am

لما تعرف اننا عايشين هنا

ومن غيرك ولا احنا هنا
لما تعرف اننا جالنا الهنا
ومن غيرك ضاع مننا
لما تعرف إنى هعرف
يوم طريقك وأوصلك
يومى وبكره
بيك أحلى فكرة
لما تيجى تانى عندنا

**omar20hatem** · من طرف **omar20hatem** في الإثنين 15 سبتمبر 2008, 8:37 am

كباية سكر وتلقيمة شاى

ماذا ستفعل إذا احتجت من جارك شيئا هل ستطلبه منه مباشرة أم أنك ستتردد وتسأل نفسك مليون مره قبل أن تطلب منه شيئا ولكننى أتذكر عندما كانت والدتى رحمها الله ترسلنى مسرعا لجيراننا الأعزاء لتطلب منهم شيئا ويستجيبوا على الفور والطلبات زهيدة جدا لمعالجة الظروف الطارئة بسرعة كبيرة جدا فكنت أسرع لأحضر لأمى.....

كباية سكر – كباية زيت – تلقيمة شاى – صحن رز – طبق دقيق –كيلة ذرة – طقم الشربات – باجور الجاز – رغيفين عيش - حتة جبنه حادقة - ليمونة خضره – اسبرينة – صيجان الكحك - صوانى القرص – المقشة البلح –الصلاية –.......الخ

إذا عدنا بالزمن إلى الزمن الجميل لتراءت أمام أعيننا أفعال جميلة وذكريات رائعة
أفعال دائما مانعرفها بالعادات والتقاليد والأعراف نعم إنها الأعراف الجميلة

والشوارع النظيفة أمام كل البيوت لأن الناس كانت جميعا بتكنس أمام بيوتهم

زفة العريس والعروسة من البيت للبيت وإزازتين البيبسى

مناب اللحمة يوم الخميس

وإذا ما تعمقنا بداخل تلك الأفعال والأعراف الجميلة لن نجدها سوى مبادئ إسلامية راسخة في القلوب
وأفعال تلقائية بحكم البيئة والتربية السليمة من أناس ولدوا وتربوا على الفطرة

إننا في مجتمعنا الريفي العظيم ترعرعنا على التآخي والشورى والمشاركة الوجدانية في الأحزان والأفراح وفى حتى الأعمال اليومية التقليدية مثل المأكل والمشرب........الخ

اللهم أعد علينا حياة التآخي والمحبة

والآن أترككم تتذكرون

كباية سكر – كباية زيت – تلقيمة شاى – صحن رز – طبق دقيق –كيلة ذرة – طقم الشربات – باجور الجاز – رغيفين عيش - حتة جبنه حادقة - ليمونة خضره – اسبرينة – صيجان الكحك - صوانى القرص – المقشة البلح –الصلاية –.......الخ

وأتمنى أن تذكروني بما فاتنى ذكره

بقلم حاتم أبوا لعزم

**omar20hatem** · من طرف **omar20hatem** في الإثنين 15 سبتمبر 2008, 8:39 am

تقول العبارة الشهيرة
لا خاب من استشار
ولى عليه تعديل بسيط أود أن أضيفه أو بمعنى أدق أعدلها
لتصبح أدق وأشمل وأنفع فتصبح المقولة
لا خاب من استخار
................................

كل منا له أحلامه وطموحاته وكل منا يطمع ويطمح بأن يكون إنسانا خيرا ومقبولا بين الناس
يريد أن يتعلم ويعمل ويلعب ويجنى ثمار أفعاله
ولكن هل فكر أحدنا انه قبل أن يتعلم أو يعمل أو حتى يلعب ؟
هل فكر بان يستخير لا أن يستشير ؟
لقد قمت مرارا وبفضل الله تعالى مستخيرا الله سبحانه وتعالى فى أمور كثيرة
وكلها متعلقة بفواصل مهمة وقاطعة فى امور حياتى بل فى أشد المسائل
والتى تقرر أهم قراراتى
ولأنى استخرت فبفضل الله وفقت
وكل العوائق أزيلت أمام أبواب الخيروكل العوائق ازدادت أمام أبواب أبعدنا الله عنها بفضله
...............................
فما أهم أن تستخير لا أن تستشير
وما أفضل ان تستشير من يدلك على أن تستخير
فحول عملك من عمى إلى نور
ومن مجهول مجهول إلى طمأنينة وسكون
فما أروع أن تستريح والراحة بيدك
وما أمتع أن تسكن مطمئنا إلى كل ما يقدره لك الرحمن
فهنيئا لمن أعانه الله على نفسه وهيأها لتقبل كل الأمور بحمد الله وثنائه
................................
أخى لا تفوت فرصة أن تجعل إلهك دليلك ومستشارك ومستخارك
فالفضل من عنده ولا تعمى نفسك باللهو
ولا تشتهى المتعة والزخرف بعيون براقة وبقلب سعيد وفرح
سعيد بفرحة مضارها قاتلة والعودة منها مستحيلة
لأنها قدرت لك ولم تطلب العون من الله مستخارك بإزاحتها عنك
وتسيييرك والتيسير عليك فى فعل الخير وتجنب النواهى والشرور
أعاننا الله على أنفسنا وهدانا إلى ما يحبه ويرضى
..................
وختاما فلا خاب من استخار

**omar20hatem** · من طرف **omar20hatem** في الإثنين 15 سبتمبر 2008, 8:40 am

المواريث

فلان قتل فلان من أجل الميراث

فلان طغى على حق أخواته لأنه الأكبر وذلك أيضا في الميراث

فلان أعطى لأخواته البنات ألف جنية تعويضا لحقهم في الميراث

فلان جعل والداه أو أحدهما مضطرين للتنازل عن أملاكهم وهم على قيد الحياة

من منا من لم يسمع بذلك أو يراه أو حتى يكون شاهدا عليه , الميراث مشكلة تؤرق كل الأخوان والأخوات , إذا رحل أحد والديهم أو كلاهما ,والسبب هو الطمع ونكران ما أنزل الله وشرع , ضاربين بكل ذلك عرض الحائط , لاهثــين وراء أطماعهم وذاكرين قول الجهالة إنا وجدنا آبائنا على ذلك , فيا ترى أي الأمرين أفضل , ترك الرعية بدون مال يتقاتلون عليه أم ترك الأملاك لهم وليكن الله في عونهم فما كان خفيا كان أعظم , نقول نربيهم أفضل تربية ونحسن أخلاقهم ونزهدهم في الدنيا , وأسألك سؤالا مباشرا عزيزي القارئ , شغل عقلك وعندك الأمثلة كثيرة وإن لم تكن تعرف فاسأل عن المقتتلين من أجل الميراث ومدى حظوظهم من التعليم والأخلاق والنسب , فستجد ما يبكيك , وهذه ليست تلميحات لأشخاص معينة , وإنما هي دروس لنستفيد جميعا وكفانا الله شر الشماتة والحسد.

هل من الأفضل أن نحاول جاهدين أن نستفيد بأملاكنا في إنفاقها بما ينفع النفس والناس كالصدقات الجارية وترك للرعية ما يقيهم السؤال .

والآن ما العمل

ترك الرعية بدون أملاك يتنازعون عليها

ترك الأملاك لهم وليكن ما يكون

الاستفادة بأغلب ما نملك ونحن أحياء في الصدقات الجارية

ويمكنكم أن تقولوا لي فلنربى أولادنا تربية سليمة لأنه مازال الخير في أمة الإسلام إلى يوم الدين

فقط أردنا أن نسلط الضوء على من لا يرعون الله في رعاياهم

وليسامحنا الله

**omar20hatem** · من طرف **omar20hatem** في الإثنين 15 سبتمبر 2008, 8:43 am

تجربة زواجى

أنا مين ومتزوج من مين و امتى وفين ممكن تسألوا بنفسكم وتتقصوا وتعرفوا

المهم في تجربتى هو ما يأتي

عندما تقدمت لخطبة زوجتي قررنا مع بعضنا ورتبنا

تحملنا كافة أعباء زواجنا دون إرهاق والدينا وعائلاتنا

واتفقت مع والدي ووالدها على هذا الأمر

ووافق الوالدان في الطرفين ورحبا بذلك

كما رحبت أنا وزوجتي اقصد خطيبتي بذلك

وبدأت رحلة الكفاح

استمرت 15 شهرا كاملا اعمل وخطيبتي تعمل

ونجمع مانملك سويا

وأذكر ساعتها اننى لم أشترى في 15 شهرا

فردة شراب واحدة مش فردتين

وبتوفيق من الله كنا نشترى ما نريد من تجهيزات وأدوات

واتفقنا على غرفة النوم والسفرة

واشترينا أدوات المطبخ والبلاستيك والصيني وخلافة

التزاماتي والتزاماتها كاملة

ولما وجدا أهلنا مدى تعاوننا وحرصنا على الانتهاء بسرعة

ساعدني والدي واهدانى الأنتريه

وساعدنا والدها والتزم بالتنجيد

وحمدنا الله كثيرا على ذلك

وجاءت مشكلة فلوس الشبكة

.......................

وبعدين تحدد ميعاد الفراح
ففوجئت بوالدى يذكرنى بموضوع الشبكة
هو انت هتتجوز من غير شبكة
قلت أيوة
قال لى ماينفعش
ومن هنا على هنا اقترحوا جميعا عندنا فى البيت
إنى لازم أشترى شبكة
وقرروا إنهم يذهبوا لجدى عبدالغنى رحمه الله
ليعطينى 2000 جنيه قرضا أشترى بيهم
الشبكة والثلاجة
شفتوا أيام العز مش زى أيامكم
وبالفعل ذهبت لجدى رحمة الله فأعطانى 1500 جنية
وقال لى تعالى بالليل وخذ الباقى
فذهبت للبيت وأنا غير سعيد
فقررت فورا الذهاب لخطيبتى وإطلاعها على الأمر
وقلت لها بالحرف الواحد
ليس عندى أى استعداد بان أتزوج مديونا لأى أحد على الإطلاق
واقترحت عليها أن نؤجل ميعاد الزواج حتى نشترى الشبكة والثلاجة
فرفضت تماما وقالت ومن قال لك بأننى أريد ثلاجة أو شبكة
وأطلعت والدها وتنازل عن المطالب
وفرحت جدا وذهبت إلى جدى مساءا
فمد يده يعطينى 500جنية فمددت يدى لاعيد له 1500 جنية
وأنا فى منتهى السعادة
ورضخ والدى للأمر الواقع
وتحدد ميعاد الفرح فى 6 أكتوبر
وجاءت لحظة الحسم
قالت لى أختى احنا هنعمل الفرح فى نادى بنها
؟؟؟؟؟؟؟؟؟؟؟؟؟؟؟؟؟
فرددت عليها مباشرة ده جميل عمرى ما هنساهلكم
؟؟؟؟؟؟؟؟؟؟؟؟؟
فقالت لى لا انت اللى هتدفع

ولما قالت لى أختى انت اللى هتدفع طبعا صدمت ورفضت رفضا قاطعا
لأنى ما جبتش شبكة ولا ثلاجة يبقى هعمل الفرح كمان فى نادى
وعلى فكرة ياجماعة لم يكن بشقتى من أجهزة سوى بوتوجاز أطلس
وغسالة ايديال المشهورة طبعا
واستعرت المسجل بتاع ابن خالتى السيد سويلم
علشان يبقى معانا فى شهر العسل وكان عندى شريط تسجيل واحد فقط
كلام الناس لجورج واصوف حتى الجيران زهقوا من الشريط
المهم والدى راح لعمى رزق الطبال وأعطاه 10 جنية
وطبعا عم رزق كان بييجى بالنقطة بس ما بياخدش فلوس
وكانت ليلة الحنة ليلة جميلة
الناس فارشة فى الشارع والبيبسى عمال ينزل من الدور الثانى
فى قفص مدلدل بحبل
وكنا طبعا موقفين حارس على برميل البيبسى
لحد ينتش ولا حاجة
وعدت ليلة الحنة وكانت من اجمل الليالى
وغدا يوم الزفاف

طبعا عدت ليلة الحنة بسلام وجمال
وتانى يوم والدى أكرمه الله كان قد رتب لى مع الأستاذ فتحى عبدالونيس
سيارة الحج رائد سعد اكرمه الله
علشان نجيب الروسة من الكوافير فى بنها
وقصة اكوافير بتاعة بنا طبعا للذى لا يعلم زوجتى كانت ممرضة فى التامين الصحى
قسم النساء والتوليد وكانت من بين النساء فى امستشفى
سيدة جاءت تولد وخطيبتى كالعادة تراعى الله فى عملها مع كل الناس
ومع مجهودها العظيم وتفانيها فى عملها مع الكل
أصرت هذه السيدة أن تجامل خطيبتى يوم زفافها
وبالفعل ذهبت خطيبتى الى اكوافير فى بنها مجاملة من تلك السيدة
جزاها الله كل خير
وقبل موضوع الكوافير تذكرت يوم عقد القران
طبعا المأذون هو جدى عبدالغنى رحمة الله
وطبعا انا الوحيد اللى المأذون ما أخذش منه فلوس فى احفادة كلهم
مش بقول لكم كانت ماشية معايا
ويوم كتب الكتاب أخذت خالى صبرى نيابة عن جدى كمأذون ووالدى وعائلتى كلها
إلى بيت العروس
ودخل الشهود ليسألوا العروسة هتوكلى مين
وخرجا الشاهدان وهما
خالها الأستاذ محمود نظمى شعلان
والحاج مصطفى مقبول أكرمة الله
وقالا العروسة وكلت أبوها
فقمت واقف وقمت قايل لهم
وأنا كمان وكلت أبويا
ووضع والدى فى يد والدها وعقد القران وأنا موجود
وتم بحدم الله عقد القران
وأعود بكم إلى يوم الزفاف
وذهبت إلى بيت جدى الحج عبدالغنى علشان أستحمى أخرج من هناك
وخرجت وركبت السيارة مع الاستاذ فتحى وابن خالتى السيد سويلم
وانطلقنا لأحضار العروسة من بنها
روحنا الكوافير كان فى عزبة السوق
روحنا لقينا المزلقان مغلق للصيانة
يادى الليلة البيضا
هنعمل ايه دلوقت
العروسة فى يمه وأنا فى يمة تانية خالص

يتبع

**omar20hatem** · من طرف **omar20hatem** في الإثنين 15 سبتمبر 2008, 8:48 am

المهم انا اقترحت ان انا أروح أعدى السكة الحديد على رجلى
وأجيب العروسة من اكوافير ونرجع تانى معديين السكة احديد
وبعدين نركب ونمشى
حلف الاساذ فتحى عبدالونيس وقال
والله اعروسة ما تمشى خطوة واحدة على رجلها
ورحنا لفينا من بعيد من عند مزلقان ميت عاصم ورجعنا على مدق جنب الترعة وجبنا العروسة
ورجعنا للبلد بسلامة الله
وطبعا كان عند بيت العوسة اقاعدة كانت منصوبة أدام بيتهم
كرسيين كبار على كنبيتين جنب بعض
والطبل اكبير شغال
وقعدنا قاعدتنا هناك واستغرقت حوالى نصف ساعة
ومشينا فى الزفة من بيتهم لبيتنا
وطبعا كل ما نعدى على بيت
يخرجوا لنا ازازتين بيسى
نحطهم على بقنا كده كأننا هنشرب
ونعطيهم للى ورانا يشربوا
طبعا انا ما كنتش بشرب علشان جعان
ومش هملى بطنى بيبسى
انا بسمع عن عشا العريس بيبقى أخر قيامه
امهم خالى صبرى الله يكرمة ويديلة الصحة
اللى ما يعرفش خالى صبرى الجزار
طبعا شايل الكاميرا ويطلع على السور ده ويصور ومن أمامى ويصور ومن ورانا يصور
فرحة بقى كبيرة
ومجدى رزق أدامى عمال يلحن بالمزمار البلدى
أغانى جميلة جدا والحريم ورانا عمال يرد وكانت زفة
جميلة جدا جدا وكنت مبسوط قوى قوى
ووصلنا البيت قبل أذان العشاء
ودخلت شقتى
ودخلم معانا القرايب وبدأت الصور والمرة دى أخويا حسام
اللى كان بيصور
وعمال يصور وفجة ندالى وقال لى
هو الفيلم ما بيخلصش ليه
خالك صور ميتين صورة وانا ميتين يبى أربعمائة
امال الفيلم ما خلصش ليه
دخلنا الحجرة انا وهو وفتحنا الكاميرا لقينا الفيلم مش متركب كويس
واتهرينا فلاش طول الطريق وجوة البيت
وبكده انتهت حكايتى وتجربة زواجى
وبما أن انا فوت كتير وما حكتهوش
ففيه هناك حكايات عى هامش التجربة
تسمعوها
ولا احكاية طلعت
ملتوتة

................................

من نتائج تجربة زواجى

عمر حاتم ابوالعزم

رضوه حاتم ابوالعزم

ولدا فى نفس اليوم

21/12/2002

21/12/1996

الساعة السادسة صباحا

فى نفس العنبر

فى نفس الساعة

فى نفس اليوم

يوم السبت

والفرق بينهما ست سنين

وهذا رقم قياسى يصعب تحقيقة

هههههههههههههههههههه

والله هى دى الحقيقة

حقائق بسيطة

أنا من مواليدقبل عيد الام بيوم
أخر أيام برج الحوت

زوجتى من مواليد يوم ثورة 23 يوليو

يوم زواجى كان 6 اكتوبر

وعلياء حاتم أبوالعزم

27/11/1999
وهو نفس عيد ميلاد
اختى العزيزة
إيــــــــــــــــــــــفاد
أى خدمة يا ستى
مبسوطة كده تماااااام

..........................

وعلى هامش التجربة
[b]خلال 15 شهر كنت أعمل فى الساحل الشمالى
وكنت أخرج صباح السبت وأعود مساء الخميس من كل أسبوع
وكانت بتوحشنى خطيبتى جدا جدا
فكنت أقعد اكتب لها جوابات طول الأسبوع
لكن الظريف جدا
إنى كنت بجمع الجوابات معايا كل أسبوع
ولما أنزل البلد مساء الخميس
أأخذهم معايا إلى بيتهم
وأقعد أقرأهم لها
وبنكون إحنا الإثنين فى غاية السعادة
وطبعا الكلام كله حلو وجميل
شبهها بالضبط
......................

وعلى هامش التجربة
يوم ما اشترينا طقم الصينى روحت ظانا وخطيبتى وأختى حنان وبنتها سارة
وأختى كانت حامل فى ابنها عمرو ساعتها
روحنا العتبة علشان نشترى الطقم الصينى
ولاننا انا وخطيبتى كنا بنتعب جدا فى تجميع الفلوس
كنا بنركز جدا فى أى حاجة نشتريها
ولما جينا نشترى طقم الصينى قررنا ننزل العتبة
وروحنا العتبة وكأننا فى يوم الحشر
لفينا انا وخطسيبتى وأختى وبنتها لما رجلينا خلاص انتهت
وفى النهاية قررنا شراء نصف طقم صينى جيد جدا
أفضل من طقم صينى كامل عادى
انا بحكى القصة دى علشان تعرفوا ان انا وخطيبتى
كنا يد واحدة فى كل شىء
مش الصينى على العروسة وأهلها نسيبهم ........ويجرى اللى يجرى
المهم اشترينا الصينى ورجعنا مشى حوالى كيلومتر علشان نوصل لمحطة الأتوبيس
واللى يضحك ازاى هركب انا وخطيبتى واختى الحامل وبنتها الصغيرة الاتوبيس
اذا كان انا لوحدى مش هعرف اركب
المهم قررت وأمرى لله
ان أنا أخذ تاكسى
وقف التاكسى قلت ناخذه لحد أحمد حلمى
وبالفعل وقف لنا وركبنا كلنا ومعانا الطقم الصينى طبعا
ههههههههههههههه
ووصلنا وسألت السواق عاوز كم قال لى 2 جنية
كنت فى منتهى السعادة
يااااااااااه اتنين جنية بس
الحمد لله المهم ركبت اختى لبيتها وروحنا نركب عربية بنها
لقينا الاستاذ محمد عونى وعربيتة وبيحمل هيروح
فرحت جدا جدا
وركبنا معاه ووصلنا لحد بيتهم اللى جنب بيت سيدى عبدالغنى
ونزلنا من العربية وخطيبتى كانت لابسة جزمة بكعب
رجليها استوت قامت قالعة الجزمة وشالت الطقم
وروحت للبيت حافية
وانا وراها بشجعها وشايل لها الجزمة
هههههههههههههه
والله كانت ليلة زى العسل
ووصلنا ونسينا كل التعب
وفردنا الطقم كلة فى الصالة عندهم وفرحنا فرحة كبيرة جدا
ونسينا كل التعب

....................

مرة من المرات الكتير اللى أخذت خطيبتى ورحنا نتفسح فى القاهرة
رحنا الحديقة اليابانية فى حلوان
واحنا قاعدين قاعدة حبايب وكل الكلام اللى بيننا حلو
لقيتها بتقول لى
انا ايه اللى يضمن لى انك مش هتسيبنى
فى وسط الطريق وتخلى بى
قلت لها هو انت تعرفى عنى كده
قالت لى لا طبعا
لكن الظروف مش مضمونة
قلت لها خلاص شوفى ايه الضمان بالنسبة لك
وانا اعمل هولك
قالت لى تكتب لى وصل أمانة
فكرت شوية وقلت لها وماله
تحت أمرك أكتب لك وصل امانة
قلت لها بكام
قالت شوف انت
قلت لا علشان ما نكدبش على بعض هكتب لك وصل امانة بعشرة الاف جنية
رفضت طبعا
قلت لها امال بكم
قالت بخمسين الف جنية
بصيت لها واستغربت قلت لها كتير جدا كده
قالت هوه ده طلبى
وشرطى
قعدت أفكر كتير وقلت انا عندى حل كويس
قالت قول
قلت لها نحط العشرة بتوعى على الخمسين بتوعك
ونقسمهم على اتنين
يبقوا ثلاثين الف
كده حل وسط واكتب لك وصل الامانة بالمبلغ ده واعتقد انه مبلغ كويس ويطمئن
الكلام ده طبعا 1994 م
وبالفعل كتبت وصل الامانة بثلاثين الف جنية
ومضيت عليه واخذته فى ايديها وقرأته وقطعته بعد قراءتة
وقالت لى
انا مآمناك على نفسى وروحى
تطلع ايه الفلوس دى اللى تعمل حاجز بينى وبينك
انا بس كنت بشوف غلاوتى عندك
والكلام ده طبعا ياجماعة حقيقى ومش مترتب ولا حاجة
وما تفتكروش انكم بتتفرجوا على فيلم سينمائى
انا بكلمكم عن تجربتى

............................

فى يوم من الايام وخطيبتى طبعا كانت تعمل ممرضة بالتأمي الصحى
وكان عندها نبطشية فى اليوم ده يعنى
تشتغل من 8 صباحا حتى 8 مساءا
ولما الدنيا ليلت وكان الايام ايام شتاء
وانتم عارفين الساعة 8 فى الشتا يعنى ايه تقريبا نص الليل
المهم بلدنا الجميلة كانت كلها طين وأخر حلاوة
والمطر مازال بيرخ
والشوارع طين
والكهربا قاطعة
قلت أروح انتظرها على الموقف
وأخذت معايا خالى وبرده يبقى أخويا رضا ابوالمعاطى
واحنا فى الطريق مرينا قعدنا شوية عند دكان الاستاذ سعيد سالم
كان مكان دكان الحج جاد ابوجبة الان
وكان عمنا سعيد الله يكرمه مشغل كلوب للناس اللى بتعدى
أل ايه علشان ينور لهم
وعمنا سعيد أول ما يشوف حد جى يعدى يقوم مدى الكلوب ابرة يقوم مضلم
وصاحبنا ينزل يعك فى الطينة وبعد ما يعدى عمنا سعيد يقوم مصلح الكلوب ومدى له نفس
يتعدل
وينتظر صاحبنا اللى جاى وهكذا
انا قلت مش باين لها حل ومش هنفلت من سعيد
قمت رايح جايب كوز صفيح وشمعة وحاطط الشمعة فى الكوز
ومولعها ومنور الطريق زى كشافات العربية كده
وقلت حمارتك العارجة أحسن
وانتظرتها على الموقف انا ورضا
ولما وصلت نورت ادنيا طبعا وماكانش الموضوع محتاج شمع ولا كوز صفيح
امهم نورت هيه وزيدنا النور بالكوز والشمعة واخذناها وروحناها عندهم فى البيت
وكان جزائنا اننا اتعشينا
والحمد لله
شفت اللى يقدم خير يلقاه ازاى
حلوة ولا ملتوته

....................

انتهت تجربتى وشكرا لكم[/b]

**omar20hatem** · من طرف **omar20hatem** في الثلاثاء 25 نوفمبر 2008, 7:04 pm

ردا على قصيدة غيطان الدرة
أو قصيدة شتا
.......
للشاعر محمود رضوان
....

من جوه الغيطان بريدى هيوصلك
ويفكرك
بأن الدفى والصفى ساكنك ومحصنك
ولو تاهت فيك الدروب أو ضللتها
بص فى مرايتك وف كتابك واوصل لها
دى عيونى سكتك وفرشتك ورعشتك
مستنياك ف قلب غيطان الذرة
.......

حبيبتك

**omar20hatem** · من طرف **omar20hatem** في الخميس 04 ديسمبر 2008, 12:15 pm

أبوربيع يا مدوخنا
.........................

أبوربيع يا مدوخنا

فينك وفين أراضيك

مش عارفين ازاى نراضيك

أو نلاقيك

أصل الهجر مش من طابعك

مش عارفين ازاى هنساعدك

غيبة وحضرة

حضرة وغيبة

حيرتنا....

زهقتنا .....

مش عارفين ازاى نراضيك

أو نلاقيك

يا مدوخنا

يوم نصبح على صورة جميلة

أو تفعيله

او نلاقيك جوه الإبداع

مليان اشعاع

والأعضاء عماله تشيد

برسم جديد

من انتاج المبدع دايما

أبوربيع

بعد شوية ألف وأدور

على مواضيعك

على أخبارك

يقولوا مسافر

سابنا وهاجر

راح المرسى أو كاترين

مش صابرين

أكلف خاطرى بخمسين قرش

واشد رساله

مش بطاله

تقول الشغل كتير ومتلتل

طب استهبل

طنش حبه لجل خاطرنا

ولا أقولك لجل خاطرنا

حبه وحبه

حبه علينا وحبه عليهم

ماتميلش الكفه ليهم

طبعا ما تصدقش كلامى

بس بنقل لك سلامى

لما بتنجح كله بينجح

لما بتعلى كله بيعلى

وما نقدرش

على توهانك

أو زوغانك

طبعا منا

علشان كده دايما بنقول

بصوت موصول

لما تغيب

راح توحشنا

يا أبوربيع يا مدوخنا

فينك وفين أراضيك

مش عارفين ازاى نراضيك

أو نلاقيك

يا مدوخنا

**omar20hatem** · من طرف **omar20hatem** في الإثنين 23 فبراير 2009, 12:54 pm

جملة غير تامة ولجعلها استفسارا تاما نقول

ماذا سيحدث عندما يغيب الرادع ؟

وقبل ان نتطرق للنتائج دعونا نفكر سويا ماهو الرادع ؟

الرادع هو ذلك المانع الذى يحول دون اى أذى يقع منى أو على كشخص سواء كان ذلك الرادع قيمة او وازع أو شخص

وإذا أبحرنا فى فى السيرة سنجد نتائج غياب الرادع عند موت السيدة خديجة وأعقبها موت عم رسول الله صلى الله عليه وسلم أبوطالب واشتداد أذى المشركين لرسول الله وصحبه وهما كانا الرادع للمشركين من وجهة نظرالمشركين طبعا

إذا فالرادع هنا هو شخص

وقد يكون الرادع هو أبى أو أمى وطالما هما بصحة جيدة فهم يقفون رادعا لى كشخص عن اى محاولات غبية أو قاصرة أو غير مسؤولة منى تجاه الأخرين وحمايتهم منى كشخص والعكس صحيح أيضا فهم يقفون حائلا دون إهانتى او تعرضى لأى أذى تجاهى من الأخرين 0

والسؤال الأكثر أهمية هنا هو

هل عند غياب الرادع أو فقده أقوم كشخص بالخروج من قمقمى وأنتفض غير آبه لأى شخص أو شىء متهما الجميع بالقصور والتخلف ويعمى بصرى عن رؤية اى صواب إلا ما بنفسى وتصورها ؟

هل يكون التقصير فى تلك الحالة من الآباء والأمهات جعل أنفسهم كأشخاص محل الرادع ؟

استفهامات وجب التعليق عليها 0

نستنبط مما هو عاليه أن للرادع وظيفتان

الاولى هى حمايتى من أذى الأخرين

الثانية حماية الأخرين منى انا

وعند فقد الرادع كشخص تنتهى وظيفتيه ويبقى الشخص بلا حماية من نفسه أو على نفسه 0

والسؤال الذى أترك تعليقاتكم عليه هى محل النقاش للوصول إلى تطبيق سليم

هل يجب أن يكون الرادع

شخص

أم قيمة

أم هناك حقيقة أغفلناها فى الحوار ؟

بقلم حاتم أبوالعزم

**omar20hatem** · من طرف **omar20hatem** في الإثنين 23 فبراير 2009, 12:55 pm

الألقـــــــــــــــــــــــــــــاب

ماذا يمثل لك لقبك ؟

هل تنتابك الفرح عندما تسمع الناس ينعتوك بلقبك؟

هل تحزن إذا جردك مناديك من لقبك؟

نتعب كثيرا ونذاكر كثيرا ونجتهد حتى نتخرج من دراستنا ونحصل على لقب

.دكتور .......باشمهندس ......أستاذ......كابتن.......أسطى........الخ

وهناك القاب لا تاتى بالتعليم ونوع الدراسة ولكنها تأتى بحكم السن أو الشعيرة الدينية مثل

حج......شيخ......سيدنا......الخ

وبالطبع نقصد هنا الذكور والإناث سواء

ولكن هناك طبقة من الناس عفويين بطبعهم فهم لا يفهمون من أنت حتى أنهم لا يطلقون الالقاب على أى أحد

وعندما يتحفظون وينطقونها يفعلون ذلك بالخطأ فالكل عندهم استاذ مثلا

فهل يضايقك هذا الأمر ؟

وهناك من الناس من يتعمد أن يسقط عنك لقبك حسدا أو كبرا منه عليك

وهناك من يسقط عنك لقبك لأنه لا تهمه الألقاب وهو ملقب بها أيضا

وهناك من يحرص على ان يناديك بلقبك حرصا منه على ان ينعت بلقبه

والأمثلة كثيرة ومتعددة من الناس وأنواعهم ومدى حرصهم ومدى تواضعهم

والأن أين أنت منهم ؟

مؤيد معارض متحفظ

**omar20hatem** · من طرف **omar20hatem** في الإثنين 23 فبراير 2009, 12:56 pm

المؤهل الدراسى

أول سؤال بيتسأله التلميذ فينا لما يدخل المدرسة هو ...

إنت فى سنة كم ؟

ويجيب ببراءة سنة أولى .

وتانى سؤال يتسأله ببراءه هو..

نفسك تطلع إيه ؟

ويجيب أيضا ببراءه مهندث.....

ونكبر وتكبر معانا الأمانى والطموحات وندخل الإعدادى وبعدين الثانوى حتى نصطدم بالثانوية العامة .

سواء كانت سنة زى زمان سنة واحدة أو سنتين زى دلوقتى أو سنة واحده زى بكرة او بعده .

...........................

وفى الثانوية العامة أو الفنية أو التجارية أو الزراعية أو غير ذلك من التخصصات تقتل الأمانى أو تنمو.

ولكن هناك من يستطيع أن يحلم ويثابر ويحقق حلمه وهناك من يسقط فى فخ المؤهل الدراسى الذى هو لب موضوعنا الأن .

فحين لا يسعفك المجموع النهائى فى الثانوية عند اختيار كليات القمة المشهورة يقف بك الزمن ويتسمر،وتفقد كل مقومات النجاح والصواب فى الإختيار الامثل لنوع الدراسة او التخصص المناسب لموهبتك وإمكانياتك الذهنية والنفسية وربما تكون موهوبا فى مجال معين وتفقد موهبتك بإختيار أصم وأعمى وأخرس عندما تقرر بكل وهن وخزى ... بمقولة توارثناها بلا هوية وزرعناها فى عقولنا الباطنة وتملكتنا وهيمنت علينا وهى مقولة !!!!

لازم آخد مؤهل عالى وخلاص .......

وحقيقة الامر أننى تنبهت لمثل هذا الأمر الخطير فى حوارى مع أحد اصدقائى النبهاء حول نفس القضية .

وقد سالنى سؤال أدهشنى !

قال لى بالفم المليان هل يوجد هناك فرد فى قريتنا غير متعلم عاطل ؟

واجاب بدون تردد ولم يترك لى حتى مجال للتفكير وقال بالفم المليان .

اتحداك ان تعرف لى إنسان حرم من الدراسة ولا يعمل ويكدح من أجل الرزق بهمة ونشاط .

وسؤالى التقليدى كأى إنسان محتار ومدهوش بالقضية لصديقى العزيز بادرته سائلا.

هل هذه دعوة لترك التعليم والدراسة ؟

وهو سؤال تقليدى وأنأى بصديقى عن هذا التفكير بالطبع ولكنه تبسم وأجاب بما أريد ان اسمع .

حاشى وكلا أن أهدم بمعول العصبية والجهل أول أوامر ديننا الحنيف بالدعوة فى أول كلمات القرآن الكريم بكلمة .....اقرأ....

ولكن هو توجيه وتعريف بالإختيار الأمثل والمناسب لقدراتنا ومواهبنا لا أن ننخرط وراء مفاهيم غبية وعادات موروثة لا تفيد ولا تغنى ولا يتحمس لها إلا مرضى العقول والنفوس .

عند بوابة الإختيار سواء كان ذلك بعد الدراسة الإعدادية او الدراسة الثانوية عليك ان تقرر بدقة المجال الذى تتفوق فيه لا أن تكون مجرد فردا عاديا وسط كل الأفراد .

بمعنى أوسع وأشمل إنني مثلا قد أخفقت فى دخول كلية الطب مثلا وميولى وأهدافى وموهبتى فى نفس المجال ،

فلماذا أحرم نفسى من العطاء فى مجال موهبتى وحبى وراء قيود تفكير مريض .

ما الذى يمنعنى أن ألتحق بكلية التمريض مثلا وإن فاتتنى فلماذا لا ألتحق بمعهد للتمريض أو معهد فنى صحى أو أدرس حتى دبلوم التمريض .... الغرض الرئيسى من الفكرة واضح وصريح أن نتحرر من قيود المؤهل الدراسى ومدى ارتباطنا به من حيث الوجاهة الإجتماعية المزيفة ..... فالإنسان العامل أفضل وأزكى الرائحة من حملة المؤهلات العليا المترامون فى طابور العاطلين على مدد البصر .

والمثل عاليه ماهو إلا مجرد مثل واحد لتخصص واحد والقياس على هذا المثل واضح وصريح .

فقس على ذلك الموهوبون فى الفن والرياضيات والرياضة واللغة العربية والأجنبية والتاريخ والجغرافيا والتصوير والمهارات المختلفة بسائر انواعها .

فقط عليك ان تقرر أن تعمل ما تحب وان تحب ما تعمل

عليك ان تقرر ما إذا كنت تريد ان تكون فى طابور العاملين لا فى طابور العاطلين

عليك ان تتحرر من موروثات صماء عمياء لا تجدى نفعا

وأخيرا قال رسول الله صلى الله عليه وسلم
مامن نبى إلا ورعى الغنم
صدق رسول الله صلى الله عليه وسلم

وهذا مثال قاطع على مدى الجد والمثابرة والإجتهاد
فى سبيل الرزق بالشرف
لا بالمفاخر

بقلم حاتم ابوالعزم

أعمالى

أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى

رد: أعمالى