تجربة زواجى

من طرف **omar20hatem** الجمعة 28 مارس 2008, 9:59 pm

تجربة زواجى

أنا مين ومتزوج من مين و امتى وفين ممكن تسألوا بنفسكم وتتقصوا وتعرفوا

المهم في تجربتى هو ما يأتي

عندما تقدمت لخطبة زوجتي قررنا مع بعضنا ورتبنا

تحملنا كافة أعباء زواجنا دون إرهاق والدينا وعائلاتنا

واتفقت مع والدي ووالدها على هذا الأمر

ووافق الوالدان في الطرفين ورحبا بذلك

كما رحبت أنا وزوجتي اقصد خطيبتي بذلك

وبدأت رحلة الكفاح

استمرت 15 شهرا كاملا اعمل وخطيبتي تعمل

ونجمع مانملك سويا

وأذكر ساعتها اننى لم أشترى في 15 شهرا

فردة شراب واحدة مش فردتين

وبتوفيق من الله كنا نشترى ما نريد من تجهيزات وأدوات

واتفقنا على غرفة النوم والسفرة

واشترينا أدوات المطبخ والبلاستيك والصيني وخلافة

التزاماتي والتزاماتها كاملة

ولما وجدا أهلنا مدى تعاوننا وحرصنا على الانتهاء بسرعة

ساعدني والدي واهدانى الأنتريه

وساعدنا والدها والتزم بالتنجيد

وحمدنا الله كثيرا على ذلك

وجاءت مشكلة فلوس الشبكة

يتبع

من طرف الخليفه الجمعة 28 مارس 2008, 11:46 pm

اكمل انا ولا اقولك بلاش
قول انت

من طرف **الحريف** السبت 29 مارس 2008, 10:37 am

جميل ان تحكي لنا مثل هذه التجارب
ان السعي للحلال يأتي بالكد والمثابره
ابو عمر تنظر البقيه
بعد ماتتنتهي
راح احكي لكم قصة مشواري للزواج
لسه فرحي راح يكون 26/6/2008م

من طرف **omar20hatem** الأحد 30 مارس 2008, 6:39 am

وبعدين تحدد ميعاد الفراح
ففوجئت بوالدى يذكرنى بموضوع الشبكة
هو انت هتتجوز من غير شبكة
قلت أيوة
قال لى ماينفعش
ومن هنا على هنا اقترحوا جميعا عندنا فى البيت
إنى لازم أشترى شبكة
وقرروا إنهم يذهبوا لجدى عبدالغنى رحمه الله
ليعطينى 2000 جنيه قرضا أشترى بيهم
الشبكة والثلاجة
شفتوا أيام العز مش زى أيامكم
وبالفعل ذهبت لجدى رحمة الله فأعطانى 1500 جنية
وقال لى تعالى بالليل وخذ الباقى
فذهبت للبيت وأنا غير سعيد
فقررت فورا الذهاب لخطيبتى وإطلاعها على الأمر
وقلت لها بالحرف الواحد
ليس عندى أى استعداد بان أتزوج مديونا لأى أحد على الإطلاق
واقترحت عليها أن نؤجل ميعاد الزواج حتى نشترى الشبكة والثلاجة
فرفضت تماما وقالت ومن قال لك بأننى أريد ثلاجة أو شبكة
وأطلعت والدها وتنازل عن المطالب
وفرحت جدا وذهبت إلى جدى مساءا
فمد يده يعطينى 500جنية فمددت يدى لاعيد له 1500 جنية
وأنا فى منتهى السعادة
ورضخ والدى للأمر الواقع
وتحدد ميعاد الفرح فى 6 أكتوبر
وجاءت لحظة الحسم
قالت لى أختى احنا هنعمل الفرح فى نادى بنها
؟؟؟؟؟؟؟؟؟؟؟؟؟؟؟؟؟
فرددت عليها مباشرة ده جميل عمرى ما هنساهلكم
؟؟؟؟؟؟؟؟؟؟؟؟؟
فقالت لى لا انت اللى هتدفع

يتبع

من طرف **omar20hatem** الأحد 30 مارس 2008, 9:11 am

علم يا بشمهندس
مفاوضات الخطوبة استمرت فترة طويلة حتى الموافقة فى مارس 1994 م
الزفاف 6 اكتوبر1995 م
وبارك الله لك وفيك يا بشمهندس
وأدام عليكم الأفراح

من طرف **alielsokkary** الأحد 30 مارس 2008, 12:03 pm

الف مبروك يا هندسة باثر رجعى زى ما قال المهندس ابودسوقى بس انا كنت فى مصر وما اتعزمتش
بس فكرة جديدة يا هندسة احييك عليها وياريت اى عضو عندة تجربة تفيد الاخرين يقولها

مبروك مقدما للحريف وياريت يعزمنا وما يعملش زى المهندس حاتم بس تذكرة الطيران على حسابك

من طرف **omar20hatem** الأحد 30 مارس 2008, 12:22 pm

ولما قالت لى أختى انت اللى هتدفع طبعا صدمت ورفضت رفضا قاطعا
لأنى ما جبتش شبكة ولا ثلاجة يبقى هعمل الفرح كمان فى نادى
وعلى فكرة ياجماعة لم يكن بشقتى من أجهزة سوى بوتوجاز أطلس
وغسالة ايديال المشهورة طبعا
واستعرت المسجل بتاع ابن خالتى السيد سويلم
علشان يبقى معانا فى شهر العسل وكان عندى شريط تسجيل واحد فقط
كلام الناس لجورج واصوف حتى الجيران زهقوا من الشريط
المهم والدى راح لعمى رزق الطبال وأعطاه 10 جنية
وطبعا عم رزق كان بييجى بالنقطة بس ما بياخدش فلوس
وكانت ليلة الحنة ليلة جميلة
الناس فارشة فى الشارع والبيبسى عمال ينزل من الدور الثانى
فى قفص مدلدل بحبل
وكنا طبعا موقفين حارس على برميل البيبسى
لحد ينتش ولا حاجة
وعدت ليلة الحنة وكانت من اجمل الليالى
وغدا يوم الزفاف

يتبع

من طرف **omar20hatem** الأحد 30 مارس 2008, 12:25 pm

نعزمك ياعلى فى فرح عمر ان شاء الله
وتكون العروسة من نسلك بإذن الله

من طرف **أبو اياد** الأحد 30 مارس 2008, 1:32 pm

مشوار جميل وعظيم
وطبعا الكلام دا غير موجود الان علي الاطلاق لابد من الشبكه والشقه والعزال ويكون عموله والايديال والاتوماتيك والمكنسه اوعي تنساها واوعي تنسي النيش بلاش نكمل الله يكون في عون اللي عايز يتجوز اليومين دول
وعلي العموم الف مليون مبروك وابقي اعزمني في فرح عمر وياريت تكمل بقيت المشوار وتورنا ربنا كرمك اد ايه
وسؤال اخير لو جه عريس لبنتك وطلب منك ما طلبته من حماك هتوافك ولا لاء

من طرف **sondos** الأحد 30 مارس 2008, 3:55 pm

الحلقــــــــــــات اكثر من مشوقة ...

بالذات مع ملامستها للواقــــع ...
وعلى الرغم من قدم الاحداث لكني لم ارى حتى الان غير تشابه كبير مع واقع الحال في زيجات هذه الايام
طبعاً مع فــــــارق اختلاف تسعيرة الجنية ايامها قبل ما يتعوم اليومين دول ...
يعني مأساة تجهيزات وتكاليف الزواج كانت هي هي تقريباً ... بس نفوس الناس الحلوة هي اللي اتغيرت

اطالبك بالمزيد من التفاصيل بشمهندس \حاتــــــم ... فلا تبخل علينا

بــــــــــارك الله لك في اهل بيتك ورزقك بهم كل خير

من طرف **mezo2010** الأحد 30 مارس 2008, 5:25 pm

بارك الله لكم وفيكم
وفي ابنائكم

من طرف **سارة** الأحد 30 مارس 2008, 5:29 pm

فكرة الموضوع جميلة جدا وتشوقنا لباقى القصة
مع دعواتنا بالتوفيق الدائم
ويجمعكم الله دائما على المحبة والسعادة برضى الرحمن
ويقر عيونكم بأطفالكم
آمين

من طرف **omar20hatem** الأحد 30 مارس 2008, 6:45 pm

الباشا حماده فتحي عامر كتب:مشوار جميل وعظيموسؤال اخير لو جه عريس لبنتك وطلب منك ما طلبته من حماك هتوافك ولا لاء

بفضل الله سبحانة وتعالى انا عندى شرطين للى هيتجوز بناتى إن شاء الله
أن يكون زوجا ذا دين فإذا جاءكم من ترضون دينة فزوجوه وإلا تكن فتنة فى الأرض
والثانية أن يسكن معى فى بيتنا وهيكون له شقة منفصلة إن شاء الله
وأعاننا الله على تحقيق ما نحلم
فما نقصد سوى لم الشمل والتيسير على خلق الله
بس نلاقى اللى يرضى ربنا وبناتنا
ويعاملهم كما يجب ان تعامل الزوجة المسلمة

من طرف **omar20hatem** الأحد 30 مارس 2008, 6:50 pm

sondos كتب:

وعلى الرغم من قدم الاحداث لكني لم ارى حتى الان غير تشابه كبير مع واقع الحال في زيجات هذه الايام
طبعاً مع فــــــارق اختلاف تسعيرة الجنية ايامها قبل ما يتعوم اليومين دول ...
يعني مأساة تجهيزات وتكاليف الزواج كانت هي هي تقريباً ... بس نفوس الناس الحلوة هي اللي اتغيرت

إلى الدكتورة سندس
تلاحظين ان الله فتح على وكونت نفسى بمساعدة خطيبتى فى 15 شهرا
لم نغالى فى أى شىء كنا دائما نختار أبسط شىء
حتى توفيق الله أوجد لى فى كل مكان أشترى منه من يعيننى ويساعدنى
ويختار لى أفضل الأشياء بأقل الأسعار
ولم نكلف اهالينا أى شىء
فمن أراد العفاف لا يرد له دعاء

من طرف **omar20hatem** الأحد 30 مارس 2008, 7:05 pm

طبعا عدت ليلة الحنة بسلام وجمال
وتانى يوم والدى أكرمه الله كان قد رتب لى مع الأستاذ فتحى عبدالونيس
سيارة الحج رائد سعد اكرمه الله
علشان نجيب الروسة من الكوافير فى بنها
وقصة اكوافير بتاعة بنا طبعا للذى لا يعلم زوجتى كانت ممرضة فى التامين الصحى
قسم النساء والتوليد وكانت من بين النساء فى امستشفى
سيدة جاءت تولد وخطيبتى كالعادة تراعى الله فى عملها مع كل الناس
ومع مجهودها العظيم وتفانيها فى عملها مع الكل
أصرت هذه السيدة أن تجامل خطيبتى يوم زفافها
وبالفعل ذهبت خطيبتى الى اكوافير فى بنها مجاملة من تلك السيدة
جزاها الله كل خير
وقبل موضوع الكوافير تذكرت يوم عقد القران
طبعا المأذون هو جدى عبدالغنى رحمة الله
وطبعا انا الوحيد اللى المأذون ما أخذش منه فلوس فى احفادة كلهم
مش بقول لكم كانت ماشية معايا
ويوم كتب الكتاب أخذت خالى صبرى نيابة عن جدى كمأذون ووالدى وعائلتى كلها
إلى بيت العروس
ودخل الشهود ليسألوا العروسة هتوكلى مين
وخرجا الشاهدان وهما
خالها الأستاذ محمود نظمى شعلان
والحاج مصطفى مقبول أكرمة الله
وقالا العروسة وكلت أبوها
فقمت واقف وقمت قايل لهم
وأنا كمان وكلت أبويا
ووضع والدى فى يد والدها وعقد القران وأنا موجود
وتم بحدم الله عقد القران
وأعود بكم إلى يوم الزفاف
وذهبت إلى بيت جدى الحج عبدالغنى علشان أستحمى أخرج من هناك
وخرجت وركبت السيارة مع الاستاذ فتحى وابن خالتى السيد سويلم
وانطلقنا لأحضار العروسة من بنها
روحنا الكوافير كان فى عزبة السوق
روحنا لقينا المزلقان مغلق للصيانة
يادى الليلة البيضا
هنعمل ايه دلوقت
العروسة فى يمه وأنا فى يمة تانية خالص

يتبع

من طرف **omar20hatem** الأحد 30 مارس 2008, 7:06 pm

سارة كتب:فكرة الموضوع جميلة جدا وتشوقنا لباقى القصة

شكرا على المجاملة اللطيفة
وادعولنا دايما بالخير

من طرف htmhm الأحد 30 مارس 2008, 8:16 pm

بجد يا هندسة الشقة عليك
خلاص انا موافق يا سيدى
ههههههههههههههههههههههه
بصراحة موضوع جميل جسدتة بواقعية دون تصفيف او تجميل او زخرفة
تقبل تحيتى على هذا الموضوع الرائع

من طرف **omar20hatem** الأحد 30 مارس 2008, 8:44 pm

htmhm كتب:بجد يا هندسة الشقة عليك
خلاص انا موافق يا سيدى
ههههههههههههههههههههههه
بصراحة موضوع جميل جسدتة بواقعية دون تصفيف او تجميل او زخرفة
تقبل تحيتى على هذا الموضوع الرائع

عندك اختبار صعب تجتازة
وتنول الشقة
ان تكون ذا دين
ياله اتجدعن واستعد للاختبار
والاختبار هو
مدى حكم الناس عليك
لوقالوا زين يبقى اتفقنا وتشرفنا
ههههههههههه
شكرا على المجاملة

من طرف **Abo Dina** الأحد 30 مارس 2008, 8:46 pm

ألف مبروك يا بشمهندس
وعقبال عمر يا رب

فكرة الموضوع جميلة جدا ، ويا ريت تضيف عليها إن بعد ما تخلص ترشح واحد بعدك متزوج ليحكي لنا قصة زواجه
على شرط تكون من الكبير للصغير
بمعني أصح نبدأ من الزمن الجميل

من طرف **mezo2010** الأحد 30 مارس 2008, 9:04 pm

يا ريت الشباب اللى مش مجوز يتعلم
اكتر حاجه نجح في البشمهندس
انه احتار صح لان الاختيار ترتب عليه
باقي القصه
بمعنى انه لو لم تكون الزوجه تتقي الله لما
كان هذا كله حدث
ثم ياتي دور الاباء لانه راعو الله ولم يغالى احد منهم على الاخر
وكان دور الباش مهندس
الذي عرف امكانياته وحدوده وتصرف على هذا الاساس
زلم يحمل نفسه عبء
بل توكل على الله
واهم شىء لاى شخص مقدم على الزواج
ان يختار الزوجه الصالحه التى تراعي الله فيه وفي ذريته ان شاء الله

وأتجه الى الاباء يسرو على من يأتيكم خاطب لبناتكم
حت ييسر على ابنائكم

وياليتنا نتبع سنة الحبيب

من طرف folladona الأحد 30 مارس 2008, 10:34 pm

وياريت تقولنا كمان ما الفرق بين الجواز عن حب والجواز التقليدى

من طرف **أبو اياد** الإثنين 31 مارس 2008, 9:48 am

[quote="omar20hatem [/quote]

بفضل الله سبحانة وتعالى انا عندى شرطين للى هيتجوز بناتى إن شاء الله
أن يكون زوجا ذا دين فإذا جاءكم من ترضون دينة فزوجوه وإلا تكن فتنة فى الأرض
والثانية أن يسكن معى فى بيتنا وهيكون له شقة منفصلة إن شاء الله
وأعاننا الله على تحقيق ما نحلم
فما نقصد سوى لم الشمل والتيسير على خلق الله
بس نلاقى اللى يرضى ربنا وبناتنا
ويعاملهم كما يجب ان تعامل الزوجة المسلمة

[/quote]
تعليق بسيط علي هذه الكلمات
بالنسبه للشرط الاول ان شاء الله موجود ياباشمهندس
اما بالنسبه للشرط الثاني صعب ان يسكن زوج ابنتك في بيتك ممكن بيت بجوارك ولكن يكون ملكه مش كل الناس في يوافق انه يكون موجود في منزل زوجته وفي لايوافق انا كنت عايز اختبها لولي العهد اللي جاي في الطريق شهر ونصف ويوصل بالسلامه لكن كده مش عارف رأيه ايه ياتري هيوافق انا عن نفسي موافق في بيته في بيت عمه حاتم مش مشكله البيوت واحده لكن هو ميعرفشي الباشمهندس حاتم
مع تحياتي

من طرف **قرقشندي** الإثنين 31 مارس 2008, 7:02 pm

الف مبوروك مؤخرا يا باشمهنجس حكايه جميله فيها عبرة ودرس ليس لمن يرد الزواج ولكن لمن يريد ان يزوج ابنه او ابنته وعقبال الأنجال انشاء الله

من طرف **omar20hatem** الثلاثاء 01 أبريل 2008, 3:07 pm

المهم انا اقترحت ان انا أروح أعدى السكة الحديد على رجلى
وأجيب العروسة من اكوافير ونرجع تانى معديين السكة احديد
وبعدين نركب ونمشى
حلف الاساذ فتحى عبدالونيس وقال
والله اعروسة ما تمشى خطوة واحدة على رجلها
ورحنا لفينا من بعيد من عند مزلقان ميت عاصم ورجعنا على مدق جنب الترعة وجبنا العروسة
ورجعنا للبلد بسلامة الله
وطبعا كان عند بيت العوسة اقاعدة كانت منصوبة أدام بيتهم
كرسيين كبار على كنبيتين جنب بعض
والطبل اكبير شغال
وقعدنا قاعدتنا هناك واستغرقت حوالى نصف ساعة
ومشينا فى الزفة من بيتهم لبيتنا
وطبعا كل ما نعدى على بيت
يخرجوا لنا ازازتين بيسى
نحطهم على بقنا كده كأننا هنشرب
ونعطيهم للى ورانا يشربوا
طبعا انا ما كنتش بشرب علشان جعان
ومش هملى بطنى بيبسى
انا بسمع عن عشا العريس بيبقى أخر قيامه
امهم خالى صبرى الله يكرمة ويديلة الصحة
اللى ما يعرفش خالى صبرى الجزار
طبعا شايل الكاميرا ويطلع على السور ده ويصور ومن أمامى ويصور ومن ورانا يصور
فرحة بقى كبيرة
ومجدى رزق أدامى عمال يلحن بالمزمار البلدى
أغانى جميلة جدا والحريم ورانا عمال يرد وكانت زفة
جميلة جدا جدا وكنت مبسوط قوى قوى
ووصلنا البيت قبل أذان العشاء
ودخلت شقتى
ودخلم معانا القرايب وبدأت الصور والمرة دى أخويا حسام
اللى كان بيصور
وعمال يصور وفجة ندالى وقال لى
هو الفيلم ما بيخلصش ليه
خالك صور ميتين صورة وانا ميتين يبى أربعمائة
امال الفيلم ما خلصش ليه
دخلنا الحجرة انا وهو وفتحنا الكاميرا لقينا الفيلم مش متركب كويس
واتهرينا فلاش طول الطريق وجوة البيت
وبكده انتهت حكايتى وتجربة زواجى
وبما أن انا فوت كتير وما حكتهوش
ففيه هناك حكايات عى هامش التجربة
تسمعوها
ولا احكاية طلعت
ملتوتة

محدش رد يعنى

من طرف **mezo2010** الثلاثاء 01 أبريل 2008, 6:09 pm

ماااااااااااااااااااااااشي
كمل
الفكره دي حلوة
لكن يا ترى في عروسه اوعريس النهارده ممكن
يقبل ان يعمل كده
اشك

من طرف **omar20hatem** الثلاثاء 01 أبريل 2008, 7:09 pm

من نتائج تجربة زواجى

عمر حاتم ابوالعزم

رضوه حاتم ابوالعزم

ولدا فى نفس اليوم

21/12/2002

21/12/1996

الساعة السادسة صباحا

فى نفس العنبر

فى نفس الساعة

فى نفس اليوم

يوم السبت

والفرق بينهما ست سنين

وهذا رقم قياسى يصعب تحقيقة

هههههههههههههههههههه

والله هى دى الحقيقة

حقائق بسيطة

أنا من مواليدقبل عيد الام بيوم
أخر أيام برج الحوت

زوجتى من مواليد يوم ثورة 23 يوليو

يوم زواجى كان 6 اكتوبر

وعلياء حاتم أبوالعزم

27/11/1999
وهو نفس عيد ميلاد
اختى العزيزة
إيــــــــــــــــــــــفاد
أى خدمة يا ستى
مبسوطة كده تماااااام

من طرف folladona الثلاثاء 01 أبريل 2008, 11:09 pm

الحكاية كلها اتذكر فيها
امك
ابوك
اخوك
اختك
مراتك
عمر
علياء
بوسى
مش ناقص حد

من طرف **omar20hatem** الأربعاء 02 أبريل 2008, 11:11 am

وعلى هامش التجربة
خلال 15 شهر كنت أعمل فى الساحل الشمالى
وكنت أخرج صباح السبت وأعود مساء الخميس من كل أسبوع
وكانت بتوحشنى خطيبتى جدا جدا
فكنت أقعد اكتب لها جوابات طول الأسبوع
لكن الظريف جدا
إنى كنت بجمع الجوابات معايا كل أسبوع
ولما أنزل البلد مساء الخميس
أأخذهم معايا إلى بيتهم
وأقعد أقرأهم لها
وبنكون إحنا الإثنين فى غاية السعادة
وطبعا الكلام كله حلو وجميل
شبهها بالضبط

من طرف **Abo Dina** الأربعاء 02 أبريل 2008, 11:38 am

الله عليك يا هندسة وعلى كلامك الجميل
بارك الله لكما وفي زريتكما

من طرف **sondos** الأربعاء 02 أبريل 2008, 4:36 pm

القصـــــــة اكثر من ممتعــــــة ... بجد الواحد مش كان عاوزها تخلص بالسرعة دي

الشكر الجزيل لك بش مهندس على مشــــاركتنا اياها لو انك اختصرتها كتير ...

ومتابعين معك حكايات على هامش التجربة ...

من طرف **abu rabia** الأربعاء 02 أبريل 2008, 6:23 pm

folladona كتب:الحكاية كلها اتذكر فيها
امك
ابوك
اخوك
اختك
مراتك
عمر
علياء
بوسى
مش ناقص حد

علي رأي الأخت ايفاد فين بقيت الناس يا حج حاتم
دا انا واحد من الناس قعدت شايل همك سنتين تلاتة
وكمان الاستاذ / فوزي عمك تقريبا عمل مفاوضات
ولا مفاوضات استرداد طابا والاستاذ عبد الحكيم جاد
الله يرحمه
كمل بقي وقول بقية التفاصيل
خليك جرئ

من طرف **omar20hatem** الأربعاء 02 أبريل 2008, 10:18 pm

وعلى هامش التجربة
يوم ما اشترينا طقم الصينى روحت ظانا وخطيبتى وأختى حنان وبنتها سارة
وأختى كانت حامل فى ابنها عمرو ساعتها
روحنا العتبة علشان نشترى الطقم الصينى
ولاننا انا وخطيبتى كنا بنتعب جدا فى تجميع الفلوس
كنا بنركز جدا فى أى حاجة نشتريها
ولما جينا نشترى طقم الصينى قررنا ننزل العتبة
وروحنا العتبة وكأننا فى يوم الحشر
لفينا انا وخطسيبتى وأختى وبنتها لما رجلينا خلاص انتهت
وفى النهاية قررنا شراء نصف طقم صينى جيد جدا
أفضل من طقم صينى كامل عادى
انا بحكى القصة دى علشان تعرفوا ان انا وخطيبتى
كنا يد واحدة فى كل شىء
مش الصينى على العروسة وأهلها نسيبهم ........ويجرى اللى يجرى
المهم اشترينا الصينى ورجعنا مشى حوالى كيلومتر علشان نوصل لمحطة الأتوبيس
واللى يضحك ازاى هركب انا وخطيبتى واختى الحامل وبنتها الصغيرة الاتوبيس
اذا كان انا لوحدى مش هعرف اركب
المهم قررت وأمرى لله
ان أنا أخذ تاكسى
وقف التاكسى قلت ناخذه لحد أحمد حلمى
وبالفعل وقف لنا وركبنا كلنا ومعانا الطقم الصينى طبعا
ههههههههههههههه
ووصلنا وسألت السواق عاوز كم قال لى 2 جنية
كنت فى منتهى السعادة
يااااااااااه اتنين جنية بس
الحمد لله المهم ركبت اختى لبيتها وروحنا نركب عربية بنها
لقينا الاستاذ محمد عونى وعربيتة وبيحمل هيروح
فرحت جدا جدا
وركبنا معاه ووصلنا لحد بيتهم اللى جنب بيت سيدى عبدالغنى
ونزلنا من العربية وخطيبتى كانت لابسة جزمة بكعب
رجليها استوت قامت قالعة الجزمة وشالت الطقم
وروحت للبيت حافية
وانا وراها بشجعها وشايل لها الجزمة
هههههههههههههه
والله كانت ليلة زى العسل
ووصلنا ونسينا كل التعب
وفردنا الطقم كلة فى الصالة عندهم وفرحنا فرحة كبيرة جدا
ونسينا كل التعب

من طرف **Abo Dina** الخميس 03 أبريل 2008, 2:04 am

ألف مبروك يا هندسة ، وعقبال الميلامين

من طرف **hany_atc** الخميس 03 أبريل 2008, 5:28 pm

ما شاء الله

بارك الله لكما وبارك عليكما وجمع بينكما فى خير وبارك فى اولادكم
بجد
اسلوبك حلو فى الكتابة ، وكمان عرفت تشوقنا اوى للقصة ولتكملتها ،

وانا بحمد ربنا انى دخلت متأخر ولقيتها كلها خلصت فاقرأتها كها مرة واحده - مش بحب الانتظار - وخاصة لما يكون الموضوع شيق كده

من طرف **omar20hatem** الخميس 03 أبريل 2008, 7:49 pm

شكرا ياكابتن
بس انت شكلك جميل فى الصورة
هو انت تقرب للشيخ الجليل الشعراوى
ولا هو تشابه

من طرف folladona الخميس 03 أبريل 2008, 11:48 pm

ياريت ترد على ابو ربيع
وعمك عرف الموضوع وزعلان ياريت تكملة

من طرف **hany_atc** الجمعة 04 أبريل 2008, 12:11 am

من طرف **omar20hatem** الجمعة 04 أبريل 2008, 12:53 pm

والله ياكابتن هانى
انا بدأت القصة من مكان مضىء فيها
وتجنبت كثير من الأوساط المظلمة اللى عشتها
فى هذه القصة وأبوربيع وأيفاد بيلمحوا لإيه مش عارف
طبعا انا عارف ان الاوساط المظلمة فى القصة هى الأكثر اثارة
ولكنى فضلت الجانب المشرق
وأحمد الله على النهاية السعيدة
وبصراحة انا مش عارف عمى عايزنى أذكر أى جزء
بالضبط
علشان انا محتار
بين ما يريدة ابوربيع وعمى وايفاد
وما اريد ان اذكره انا

من طرف **سميرالسيد** الجمعة 04 أبريل 2008, 2:51 pm

جميلة ياهندسة
وهناك حديث نبوى يقول (فيما معناة)أقلهن مهرآ أكثرهن بركة
لكن هل الصور طلعت ام لا يوجد صور للفرح حتى الان؟؟؟

من طرف **hany_atc** الجمعة 04 أبريل 2008, 4:37 pm

انا بقول ياباشمهندس ان ده موضوعك لوحدك ، تقدر تحط فيه الجانب اللى تحبه من ذكرياتك ، ده غير انك بالفعل قدرت توصلنا الرسالة من خلال التفاصيل دية .

وممكن بقى علشان محدش يزعل تقعد انت والاخ ابوربيع والاخت ايفاد ، وتروحوا لعمك تشربوا هناك الشاى وتبقى ليله سهراية
تفتكروا فيها كل الذكريات وقل واحد يقول ويعرف اللى هو محتاجه

من طرف **omar20hatem** الجمعة 04 أبريل 2008, 5:10 pm

كده فتح الله عليك ينتظروا للصيف بقى
وعليك خير لما انزل مصر
وانت يا شيخ سمير السيد الصور بالعند فيك صورنا غيرها
وطلعت ومش هوريهالك

من طرف **omar20hatem** الجمعة 04 أبريل 2008, 5:10 pm

مرة من المرات الكتير اللى أخذت خطيبتى ورحنا نتفسح فى القاهرة
رحنا الحديقة اليابانية فى حلوان
واحنا قاعدين قاعدة حبايب وكل الكلام اللى بيننا حلو
لقيتها بتقول لى
انا ايه اللى يضمن لى انك مش هتسيبنى
فى وسط الطريق وتخلى بى
قلت لها هو انت تعرفى عنى كده
قالت لى لا طبعا
لكن الظروف مش مضمونة
قلت لها خلاص شوفى ايه الضمان بالنسبة لك
وانا اعمل هولك
قالت لى تكتب لى وصل أمانة
فكرت شوية وقلت لها وماله
تحت أمرك أكتب لك وصل امانة
قلت لها بكام
قالت شوف انت
قلت لا علشان ما نكدبش على بعض هكتب لك وصل امانة بعشرة الاف جنية
رفضت طبعا
قلت لها امال بكم
قالت بخمسين الف جنية
بصيت لها واستغربت قلت لها كتير جدا كده
قالت هوه ده طلبى
وشرطى
قعدت أفكر كتير وقلت انا عندى حل كويس
قالت قول
قلت لها نحط العشرة بتوعى على الخمسين بتوعك
ونقسمهم على اتنين
يبقوا ثلاثين الف
كده حل وسط واكتب لك وصل الامانة بالمبلغ ده واعتقد انه مبلغ كويس ويطمئن
الكلام ده طبعا 1994 م
وبالفعل كتبت وصل الامانة بثلاثين الف جنية
ومضيت عليه واخذته فى ايديها وقرأته وقطعته بعد قراءتة
وقالت لى
انا مآمناك على نفسى وروحى
تطلع ايه الفلوس دى اللى تعمل حاجز بينى وبينك
انا بس كنت بشوف غلاوتى عندك
والكلام ده طبعا ياجماعة حقيقى ومش مترتب ولا حاجة
وما تفتكروش انكم بتتفرجوا على فيلم سينمائى
انا بكلمكم عن تجربتى

يتبع

من طرف **omar20hatem** الجمعة 04 أبريل 2008, 6:03 pm

فى يوم من الايام وخطيبتى طبعا كانت تعمل ممرضة بالتأمي الصحى
وكان عندها نبطشية فى اليوم ده يعنى
تشتغل من 8 صباحا حتى 8 مساءا
ولما الدنيا ليلت وكان الايام ايام شتاء
وانتم عارفين الساعة 8 فى الشتا يعنى ايه تقريبا نص الليل
المهم بلدنا الجميلة كانت كلها طين وأخر حلاوة
والمطر مازال بيرخ
والشوارع طين
والكهربا قاطعة
قلت أروح انتظرها على الموقف
وأخذت معايا خالى وبرده يبقى أخويا رضا ابوالمعاطى
واحنا فى الطريق مرينا قعدنا شوية عند دكان الاستاذ سعيد سالم
كان مكان دكان الحج جاد ابوجبة الان
وكان عمنا سعيد الله يكرمه مشغل كلوب للناس اللى بتعدى
أل ايه علشان ينور لهم
وعمنا سعيد أول ما يشوف حد جى يعدى يقوم مدى الكلوب ابرة يقوم مضلم
وصاحبنا ينزل يعك فى الطينة وبعد ما يعدى عمنا سعيد يقوم مصلح الكلوب ومدى له نفس
يتعدل
وينتظر صاحبنا اللى جاى وهكذا
انا قلت مش باين لها حل ومش هنفلت من سعيد
قمت رايح جايب كوز صفيح وشمعة وحاطط الشمعة فى الكوز
ومولعها ومنور الطريق زى كشافات العربية كده
وقلت حمارتك العارجة أحسن
وانتظرتها على الموقف انا ورضا
ولما وصلت نورت ادنيا طبعا وماكانش الموضوع محتاج شمع ولا كوز صفيح
امهم نورت هيه وزيدنا النور بالكوز والشمعة واخذناها وروحناها عندهم فى البيت
وكان جزائنا اننا اتعشينا
والحمد لله
شفت اللى يقدم خير يلقاه ازاى
حلوة ولا ملتوته

يتبع

من طرف **سميرالسيد** الجمعة 04 أبريل 2008, 8:09 pm

كلامك لى ياهندسة بيحسسنى بحب دفين من جواك لى
وموضوعك دة اوحالى بفكرة
وهى
ان كل واحد يحكى اى موقف ظريف او غريب حدث فى فرحة
موقف هو يحكية يمكن نطلع منة بفكرة او حكمة او عظة
انا مبقولش يقول خصوصيات لكن اشياء عامة عادية
يعنى انا مثلا حدث مى موقف غريب جدا وهو
....صور الفرح اتحرقت ....اللى فى الاستديو
طبعا القصة شيقة واخرها انى طلعت الصور تانى
طبعا القصة اقل تشويقا من قصتك
فيكفى ان تجربتك فيها العظة والحكمة

من طرف **سارة** السبت 05 أبريل 2008, 12:25 am

لا حلوة طبعا وشيقة كمان

من طرف **omar20hatem** السبت 05 أبريل 2008, 6:09 am

لما تيجى تحكى خد لك جنب واحكى فيه
اتفقنا علشان تبقى حكاوى سمير
مش تتدارى فى غيرك
طبعا فاهم احنا عايزين القصة كاملة
مش كلمتين وبس
مش كده ولا ايه

من طرف **سميرالسيد** السبت 05 أبريل 2008, 3:17 pm

ماشى
لما انت تخلص الحكاية انا هخش بحكايتى
لعل يكون فيها افادة للناس
لو احد تعرض للظروف دى؟؟؟

من طرف **mezo2010** السبت 05 أبريل 2008, 3:31 pm

ماااااااااشي
بس يا ريت تكون شيقه مثل الباش مهندس
والاحلى اسلوب العرض من الباش مهندس
اديب كبير

من طرف **omar20hatem** السبت 05 أبريل 2008, 7:05 pm

يا له يا استاذ بتقرأ ايه خلصنا
روح للاستاذ سمير السيد
بدا حكايتة وركز معاه
والرابط اهو علشان ما يبقاش لكم حجة
http://www.damallo.com/montada-f20/topic-t2816.htm

أى خدمة ياعم سمير
شد حيلك بقى

من طرف **santos** الإثنين 14 أبريل 2008, 7:09 pm

انا والله مبسوطه والله من الكلام ده ونفسى اسمع تجارب كتير عشان اتعلم واعرف عشان لقدر الله مقعش فى اخطاء وكل ده اسمه ونصيب وانا فى اخر الانبساط و يارب يباركلك فى زريتك الصالحه